“Qozоqmis” korporatsiyasiga tegishli “Jomart” konidagi shaxta o‘pirilishi oqibatida 7 nafar konchi halok bo‘ldi. Bu haqda Qozog‘iston Favqulodda vaziyatlar vazirligi xabar berdi.
Qidiruv ishlari davomida 7 nafar konchi o‘lik holda topilgan. Ularning jasadi 18-fevral kuni ertalab soat 4 ga yaqin aniqlangan. Sud-tibbiy ekspertizasi o‘tkazish uchun jasadlar politsiya xodimlariga topshirilgan. Bosh vaziri O‘ljas Bektenovning topshirig‘iga ko‘ra, shaxta o‘pirilishi sabablarini tekshirish va jabrlanganlarga yordam ko‘rsatish bo‘yicha maxsus komissiya tuzilgan. Unga bosh vazir o‘rinbosari Qanat Bozumbayev rahbarlik qilmoqda.
Dastlabki ma’lumotlarga ko‘ra, “Qozоqmis” korporatsiyasi konlariga xos bo‘lmagan tabiiy gaz portlashi sodir bo‘lgan. Hodisaning tafsilotlari va sabablari aniqlanmoqda. “Jomart” konidagi shaxta qulashi ortidan jinoyat ishi qo‘zg‘atildi.
Mazkur holat yuzasidan Jinoyat kodeksining 277-moddasi 3-qismi “Tog‘-kon yoki qurilish ishlarini olib borishda xavfsizlik qoidalarini buzish” bilan ish qo‘zg‘atildi, deyiladi xabarda.
Hozirda barcha zarur tergov harakatlari olib borilmoqda.
Qozog‘iston prezidenti hamdardlik bildirdi
Qosim-Jo‘mart To‘qayev Ulitau viloyatida shaxtyorlar halok bo‘lgani munosabati bilan qurbonlarning oilasiga hamdardlik bildirdi. Prezident hukumatga favqulodda hodisa sabablarini sinchkovlik bilan o‘rganish bo‘yicha topshiriq berdi.
“Qozoqmis” halok bo‘lgan konchilarning oilalariga moddiy yordam ko‘rsatadi. Bunda xodimning o‘rtacha yillik ish haqining 10 baravari miqdorida kompensatsiya, shuningdek, dafn marosimini tashkil etish uchun 2 million tengedan ortiq mablag‘ ajratiladi.
Bundan tashqari, boquvchisini yo‘qotganlik uchun har oylik to‘lovlar, bolalarning o‘qishi uchun to‘lovlar, halok bo‘lgan xodimlarning kreditlari va qarzlarini to‘lash hamda qarindoshlarining murojaatlari bo‘yicha boshqa turdagi yordamlar ko‘zda tutilgan.
Izoh (0)