Qozog‘istonda qulagan Embraer 190 samolyotining halokatga uchrashi bo‘yicha yakuniy hisobot 2025-yil oxirigacha taqdim etiladi. Bu haqda Qozog‘iston transport vaziri o‘rinbosari Talgat Lastayev ma’lum qildi.
Xalqaro fuqaro aviatsiyasi tashkiloti tomonidan tavsiya etilgan amaliyot talablari va standartlariga ko‘ra, tekshiruv bir yil davom etadi. Shu sababli 2025-yil dekabr oyigacha tergov bo‘yicha yakuniy hisobot tayyorlanib bo‘ladi, dedi Lastayev.
Transport vaziri o‘rinbosari halokat bo‘yicha jinoiy tergov jarayoniga izoh bera olmadi.
Jinoyatni tergov qilish — bu endi prokuratura organlarining vakolati. Bu masala bilan bevosita shug‘ullanadigan tezkor-tergov guruh bor, dedi u.
Oqtovda samolyot halokati: nima bo‘lgandi?
2024-yil 25-dekabr kuni Oqtov aeroportidan uch kilometr uzoqlikda Ozarbayjonning Azerbaijan Airlines (AZAL) aviakompaniyasining Embraer samolyoti ishtirokida fojiali aviahalokat yuz berdi. Boku—Grozniy reysini amalga oshirayotgan samolyot favqulodda qo‘nishga urinish chog‘ida halokatga uchradi. Bortda 62 nafar yo‘lovchi va 5 nafar ekipaj a’zosi bo‘lgan.
38 kishi halok bo‘lgan, yana 29 kishi jarohatlangan. Prezident Ilhom Aliyevning ta’kidlashicha, layner radioelektron kurash vositalari yordamida boshqarilmaydigan holatga keltirilgan va keyin Rossiya hududidan hujumga uchragan. Uchuvchilar Rossiyaning eng yaqin aeroportlaridan biriga favqulodda qo‘nishni so‘rashgan, biroq ularga hamma joyda rad javobi berilgan, shundan so‘ng samolyot Kaspiy dengizini kesib o‘tib, Oqtov shahriga qulagan.
Aliyev halokat uchun javobgarlikni Rossiyaga yuklab aybdorlarni jazolashni talab qilgan. U, shuningdek, Moskvaning samolyotning havo hujumidan mudofaa tizimidan o‘qqa tutilishi faktini qushlar bilan to‘qnashuv va bortdagi gaz balloni portlashi haqidagi “bema’ni taxminlar yordamida yashirish”ga urinishlaridan g‘azablangan.
Izoh (0)