Afg‘onistonning Helmand provinsiyasida 15-avgust kuni soqolini olganlikda va sochini turmaklaganlikda ayblanib, o‘nlab do‘kon egalari hibsga olindi. Bu haqda Afghanistan International xabar berdi.
Ma’lumotlarga ko‘ra, “Tolibon” harakati tomonidan hibsga olinganlarning ba’zilari garov evaziga qo‘yib yuborilgan bo‘lsa-da, ayrimlar hanuz qamoqda qolmoqda. Mamlakatning Ezgulik vazirligi avvalroq barcha provinsiyalarga yuborgan xatida “soqol qo‘yish payg‘ambar sunnati” ekanini eslatib, uni bir mushtdan qisqa qilib olishni taqiqlagan edi. Shundan so‘ng Helmandda barcha sartaroshxona va hammomlarga soqol olish qat’iyan man etilgani haqida ogohlantirish yuborilgan.
Bir sotuvchining aytishicha, “odob qo‘riqchilari” so‘nggi kunlarda do‘konlarni kezib, soqoli kalta bo‘lganlarni ro‘yxatga olgan va “keyingi safar ham shunday bo‘lsa, shikoyat qilishga haqqingiz yo‘q” deb ogohlantirgan. Yana bir do‘konchi esa ukasi soqolini olgani uchun qo‘lga olinganini aytib, uni ozod qilish uchun 3 soat davomida vazirlik idorasi oldida kutganini, biroq uning kafilliksiz qo‘yib yuborilmaganini bildirgan. Mahalliy aholiga ko‘ra, “Tolibon” vakillari shahar bo‘ylab barcha do‘konlarni ro‘yxatga olib, haftasiga 2 marta tekshiruv o‘tkazmoqda. Soqoli olingan erkaklar aniqlansa, darhol hibsga olinmoqda.
Inson huquqlari tashkilotlari bu kabi amaliyotlarni shaxsiy erkinliklarni qo‘pol ravishda buzish sifatida baholamoqda. Human Rights Watch va boshqa tashkilotlar “Tolibon”ning bunday siyosati fuqarolarning kundalik hayotiga bevosita aralashuv ekanini, ayniqsa yoshlar va tadbirkorlar erkinligini keskin cheklashini ta’kidlagan.
Eslatib o‘tamiz, bundan avval ham “Tolibon” Qandahor provinsiyasida soqolini olgan yoki sochini turmaklagan ko‘plab kishini hibsga olgandi. Endi bu amaliyot Helmand provinsiyasiga ham yoyildi.
Izoh (0)