Qoraqalpog‘istonda tabiiy gazdan noqonuniy foydalangan tadbirkorlar aniqlandi, deb xabar berdi “Hududgaztaʼminot” AJ matbuot xizmati.
Maʼlum qilinishicha, Nukus shahrining “Vatanparvar” MFYda joylashgan “D.S.N.” MCHJ tomonidan qurilayotgan ko‘p qavatli uy ko‘zdan kechirilganda taʼminot korxonasi bilan shartnoma imzolamasdan ro‘yxatdan o‘tkazilmagan hisoblagich o‘rnatib, gaz tarmog‘iga o‘zboshimchalik bilan ulanib olish holati qayd etildi. Holat yuzasidan dalolatnoma tuzilib, 617 mln 760 ming so‘mlik zarar qayta hisob-kitob qilingan.
Shaharning “Gulzor” MFYda joylashgan YTT A.T.ga qarashli binoda gaz taʼminoti korxonasi bilan tegishli shartnoma imzolamasdan tabiiy gazdan o‘zboshimchalik bilan foydalanib kelinayotgani aniqlandi. Noqonuniy holat bo‘yicha 103 mln 848 ming so‘mlik zarar hisoblandi.
Xo‘jayli tumanining “Navro‘z” MFYda istiqomat qiluvchi fuqaro X.R.ga tegishli umumiy ovqatlanish maskanida isteʼmolchi “zangori yoqilg‘i”dan tabiiy gazdan foydalanish qoidalariga zid ravishda foydalanib kelayotgani maʼlum bo‘ldi. Qayta hisob-kitoblarga ko‘ra 123 mln 688 ming so‘mlik zarar keltirilgani aniqlandi.
Barcha holatlar bo‘yicha tegishli hujjatlar huquqni muhofaza qiluvchi organlarga yuborilgan.
Bunday holatlar soni ortib bormoqda
Avvalroq Samarqand viloyatidagi korxonalardan biri 553 million so‘mlik elektrdan noqonuniy foydalangani aniqlangandi. Shu bilan birga, Qashqadaryoda 177 mln so‘mlik gaz va “svet”dan noqonuniy foydalangan shaxslar ushlangani xabar qilingandi.
Shuningdek, Qashqadaryoda elektrdan noqonuniy foydalangan korxona davlatga 1 mlrd so‘mdan ziyod zarar yetkazgan. Bundan tashqari, Toshkent, Samarqand va Qashqadaryo viloyatlarida energiya resurslariga noqonuniy ulanish holatlari fosh etilgandi.
Izoh (0)