Farg‘ona viloyatining Qo‘qon shahridagi avtomobillarga gaz to‘ldirish kompresslash shoxobchasida 2,9 mlrd so‘mlik gazdan noqonuniy foydalanildi. Bu haqda Bosh prokuratura matbuot xizmati xabar berdi.
Maʼlum qilinishicha, “A.M.A” MCHJ mansabdor shaxslari jamiyatga qarashli metan zapravkaning o‘lchov qurilmalariga tashqi taʼsir ko‘rsatishi oqibatida tabiiy gazni talon-toroj qilgan.
Holat yuzasidan jamiyat mansabdor shaxslariga nisbatan Jinoyat kodeksining 169-moddasi 4-qismi “a” bandi (o‘g‘rilik juda ko‘p miqdorda) bilan jinoyat ishi qo‘zg‘atilgan.
“Svet” va gazdan noqonuniy foydalanayotgan metan zapravkalar
Aprel oyida Toshkent viloyati Bo‘ka tumanidagi metan zapravkada bir oyda 1,8 milliard so‘mlik tabiiy gazdan noqonuniy foydalanilgani aniqlangan edi. May oyida Qoraqalpog‘istonda 222,6 mln so‘mlik gazni muvofiqlik sertifikatisiz sotgan zapravka jarimaga tortilgandi.
May oyida Farg‘ona viloyatidagi metan zapravkada 1 milliard so‘mdan ziyod tabiiy gazdan noqonuniy foydalanilgani aniqlandi. Avgust oyida esa O‘zbekiston tumanidagi metan gaz to‘ldirish shoxobchasida 792,5 million so‘mlik tabiiy gazdan noqonuniy foydalanish holati fosh etilgandi.
Bundan tashqari, Angrendagi metan zapravkada 1,1 mlrd so‘mlik elektr energiyasidan, Samarqanddagi metan zapravkada 6,6 mlrd so‘mlik gazdan noqonuniy foydalanilgani aniqlangan.
Izoh (0)