Statistika agentligi 2025-yil yanvar oyidagi sanoat ishlab chiqarish hajmi bo‘yicha maʼlumotlarni ochiqladi.
Qayd etilishicha, hozirda O‘zbekistonda 56,3 mingta sanoat korxonalari faoliyat yuritmoqda. 2024-yil 1-fevralida bu raqam 68,7 mingta bo‘lgan. Mazkur turdagi korxonalar soni bir yil ichida qariyb 12 400 taga qisqargan. Shunga qaramay, oy davomida 55,8 trln so‘mlik sanoat mahsulotlari ishlab chiqarilgan (2024-yil mos davrida 44,6 trln so‘m).
Yanvar oyida bir necha muhim sanoat mahsulotlarini ishlab chiqarish hajmi sezilarli qisqargan. Buni, masalan, doimiy kamayish trendiga o‘tgan tabiiy gazni qazib olish bo‘yicha raqamlardan ko‘rish mumkin. O‘tgan oyda 3 mlrd 875 mln metr kub gaz qazib olingan. Taqqoslash uchun, 2024-yil yanvardagi natijalar 3 mlrd 994 mln metr kub edi.
O‘tgan yil yanvardagidan farqli o‘laroq, bu yilgi qishning ilk oyida elektr energiyasi ishlab chiqarish hajmi qisqardi. Oy davomida mamlakatda 7 mlrd 253 mln kVt/soat elektr energiyasi ishlab chiqarilgan (2024-yil yanvarda 7 mlrd 576 mln kVt/ soat bo‘lgan).
2025-yil yanvarda avtomobil benzini ham kam ishlab chiqarilgan — 99 tonna. O‘tgan yilning mos davrida mazkur raqam 124,6 tonna edi. Yanvarda ayniqsa, dizel ishlab chiqarish hajmi keskin qisqargan. Qishning birinchi oyida 33,2 tonna dizel ishlab chiqarilgan bo‘lsa, 2024-yil yanvarida bu ko‘rsatkich 50,2 tonna edi.
Yanvarda yengil avtomobillar ishlab chiqarish soni ham kamaygan. Xususan, respublikada 14 ming 968 dona avtomobil ishlab chiqarilgan. 2024-yil mos davridadagi raqamlar esa 15 ming 654 donani tashkil etgan. Bu yil yanvar oyi davomida eng ko‘p ishlab chiqarilgan avtomobil Cobalt — 5 660 dona ( o‘tgan yil mos davridagidan 68 foiz ko‘p) bo‘lgan.
Izoh (0)