Toshkentda 22-fevral kuni O‘zbekiston bosh vaziri Abdulla Aripov Afg‘oniston bosh vaziri o‘rinbosari vazifasini bajaruvchi Mullo Abdul G‘ani Barodar bilan ikki tomonlama muzokaralar o‘tkazdi, deb xabar bermoqda bosh vazir matbuot kotibi Bekzod Hidoyatov.
Ma’lum qilinishicha, uchrashuvda ikki davlat va xalqlar o‘rtasidagi aloqalar do‘stlik, hamkorlik va yaxshi qo‘shnichilik tamoyillariga asoslangani, Shavkat Mirziyoyev Afg‘oniston bilan barcha sohalarda konstruktiv va o‘zaro manfaatli aloqalarni rivojlantirishga alohida e’tibor qaratayotgani ta’kidlandi.
Oxirgi yillarda mamlakatlar o‘rtasida savdo-iqtisodiy va madaniy-gumanitar sohalardagi aloqalar izchil rivojlanib borayotgani, o‘tgan yili “Termiz xalqaro savdo markazi” ochilgani ikki tomonlama savdoni rivojlantirishga xizmat qilayotgani qayd etildi.
Uchrashuvda o‘zaro manfaatli aloqalarni yanada kengaytirish, savdo-iqtisodiy, energetika, transport va boshqa sohalarda hamkorlikni izchil rivojlantirish masalalari yuzasidan atroflicha fikr almashildi.
Xabarda aytilishicha, Mullo Abdul G‘ani Barodar boshchiligidagi delegatsiya 23-fevral kuni ham O‘zbekistonda bo‘ladi. Afg‘oniston delegatsiyasining O‘zbekistonga tashrifi dasturidan Toshkent shahridagi bir qator ishlab chiqarish obyektlari faoliyati bilan yaqindan tanishish ham o‘rin olgan.
“Tolibon” bosh vazirining iqtisodiy masalalar bo‘yicha o‘rinbosari Abdul G‘ani Barodar undan avval bosh vazir o‘rinbosari Jamshid Xo‘jayev bilan uchrashgandi. Uchrashuvda savdo-tranzit aloqalarini kengaytirish, o‘zbekistonlik investorlarning Afg‘onistonga investitsiya kiritishi masalalari muhokama qilindi. O‘zbekiston tomoni ikki tomonlama savdo aloqalarini faollashtirish maqsadida ikki davlat chegarasida qo‘shma savdo zonasini tashkil etishga tayyorligini aytgan. Ushbu savdo hududida qarag‘ay yong‘og‘i va paxtani qayta ishlash zavodlari, qadoqlash va logistika markazlari hamda turli oziq-ovqat mahsulotlari ishlab chiqarish sexlari joylashtiriladi.
Uchrashuvda o‘zbekistonlik sarmoyadorlar Afg‘onistondagi neft va gazni qidirish hamda qazib olish ishlarida hamkorlik qilishga, sanoat sohasiga, xususan, Samangan viloyatida sement zavodi qurishga sarmoya kiritishga tayyor ekani ta’kidlangan. Toti Maydon gaz konini o‘rganish bo‘yicha sezilarli natijalarga erishilgani va yaqin kelajakda qazib olish ishlari boshlanishi ma’lum qilindi.
O‘zbekiston Afg‘oniston bilan savdo aylanmasini 3 mlrd dollarga oshirmoqchi
Bosh vazir Abdulla Aripov 2024-yil 17-avgust kuni Kobulga tashrif buyurgandi. Muzokaralarda Afg‘oniston bilan savdo aloqalarini rivojlantirish, energetika sohasidagi samarali hamkorlik aloqalarini yangi bosqichga olib chiqish, mis, temir, neft-gaz konlarini birgalikda o‘zlashtirish loyihalarini amalga oshirish, shuningdek, transport-logistika, qishloq va suv xo‘jaligi, ta’lim, hududlararo munosabatlarni yanada chuqurlashtirish yuzasidan fikr almashilgan.
O‘zaro savdo aylanmasini 2024-yilda 1 milliard dollarga, yaqin istiqbolda esa 3 milliard dollarga yetkazish bo‘yicha barcha imkoniyatlar mavjudligi ta’kidlangandi.
Izoh (0)