Kanadaning Toronto xalqaro aeroportiga qo‘nish chog‘ida Bombardier CRJ900LR samolyoti bortida bo‘lgan yo‘lovchilarga 30 ming dollar (28 760 yevro) miqdorida tovon puli taklif qilindi.
Layner 17-fevral kuni Torontodagi Pirson xalqaro aeroportiga favqulodda qo‘nishni amalga oshirgan, u qo‘nish paytida yonib, ag‘darilib ketgan.
4819 reysining 76 nafar yo‘lovchisi va to‘rt nafar ekipaj a’zosidan hech biri halok bo‘lmagan bo‘lsa-da, ularning barchasiga tovon puli taklif qilingan. Delta Airlines vakilining ta’kidlashicha, moliyaviy taklif “hech qanday shartlar bilan bog‘liq emas”. Bu esa yo‘lovchilar aviakompaniyani sudga berishi mumkinligini anglatadi.
Agar barcha yo‘lovchilar to‘lovga rozi bo‘lsa, aviakompaniya deyarli 2,3 million dollar sarflashiga to‘g‘ri keladi.
Ushbu aviahalokat oqibatida tan jarohati olgan 21 nafar yo‘lovchi mahalliy shifoxonalarga yetkazilgan, ulardan 20 nafariga javob berilgan.
Guvohlarning so‘zlariga ko‘ra, samolyot shu qadar qattiq qo‘nganki, uning o‘ng qanoti va dumi uzilib ketgan. U yongan, shundan so‘ng uchish-qo‘nish yo‘lagida ag‘darilib ketgan. Yana bir guvohga ko‘ra, u bortda gaz hidini sezgan, kabina oynalaridan aviatsiya yonilg‘isi sizayotganini ko‘rgan va iloji boricha tezroq chiqib ketishga uringan.
Samolyot halokatiga nima sabab bo‘lgan?
Hozircha halokat sababi aniq emas. Aviatsiya mutaxassislarining fikriga ko‘ra, ehtimoliy omillar orasida: yerdagi sharoitlar, uchuvchining qo‘nishdan oldingi harakatlari va shassi bilan yuzaga kelishi mumkin bo‘lgan muammolar mavjud. Tekshiruv AQSH Milliy transport xavfsizligi kengashi ko‘magida Kanada transport xavfsizligi kengashi tomonidan olib borilmoqda.
Aniqlanishicha, qo‘nish paytida minora va uchuvchi o‘rtasidagi aloqa normal bo‘lgan. Delta reysiga taxminan soat 14:10 da qo‘nishga ruxsat berilgan. Audioyozuvlarga ko‘ra, dispetcherlik minorasi uchuvchilarni yaqinlashishda “notekis havo oqimi” haqida ogohlantirgan.
Ob-havo qanday bo‘lgan?
Kanada Meteorologiya xizmati ma’lumotlariga ko‘ra, halokat paytida Pirson aeroportida qor yog‘ib, soatiga 32 milya (51 km/soat) tezlikda shamol esgan. Havo harorati Farengeyt bo‘yicha 16,5 daraja atrofida (Selsiy bo‘yicha minus 8,6 daraja)ni tashkil etgan.
Tergovchilar samolyot qoldiqlari va uchish-qo‘nish yo‘lagini o‘rganmoqda, shuningdek, uchuvchilar kabinasidan samolyotning parvoz ma’lumotlarini qayd etuvchi yozuv qurilmalari va registratorlar laboratoriyaga jo‘natilgan.
Izoh (0)