O‘zbekiston Superligasi 19-turi doirasidagi navbatdagi bahs Qarshidagi “Markaziy” stadionda bo‘lib o‘tdi. Unda “Nasaf” G‘uzorning “Sho‘rtan” klubini qabul qilib, 2:0 hisobida g‘alaba qozondi.
Uchrashuv keskin kurashlar ostida boshlandi. “Nasaf” o‘yin favoriti bo‘lsa-da, mehmonlar munosib qarshilik ko‘rsatdi. Birinchi bo‘limda har ikki jamoa bir nechta xavfli vaziyatlar yaratdi, biroq hisob ochilmadi.
Ikkinchi taymda “Nasaf” safida bir qator o‘zgarishlar amalga oshirildi. Shundan so‘ng mezbonlar hujumkorlikni kuchaytirdi. 61-daqiqada Sharof Muhiddinov o‘yindagi hisobni ochdi. Oradan besh daqiqa o‘tib, ikkinchi bo‘lim boshida zaxiradan maydonga tushgan Sherzod Nasrullayev tablodagi natijani 2:0 ko‘rinishiga keltirib qo‘ydi. O‘yinning qolgan daqiqalari ham qiziqarli o‘tdi, ammo muxlislar boshqa gollarga guvoh bo‘lmadi.
Mazkur g‘alabadan so‘ng “Nasaf” ochkolarini 40 taga yetkazdi va onlayn turnir jadvalida 1-o‘ringa ko‘tarildi. Atigi 10 ochkoga ega “Sho‘rtan” esa turnir jadvalining so‘nggi pog‘onasida qolmoqda.
O‘zbekiston Superligasi
19-tur
16-avgust, shanba
“Nasaf” — “Sho‘rtan” 2:0
Gollar: 1:0 — Muhitdinov (61), 2:0 — Nasrullayev (66)
Izoh (0)