Farg‘ona viloyat prokuraturasi, IJQK departamenti viloyat boshqarmasi tomonidan yoqilg‘i - energiya resurslaridan noqonuniy foydalanish bilan bog‘liq holatlarni fosh etishga qaratilgan nazorat tadbirlari davom etmoqda. Bu haqda Bosh prokuratura matbuot xizmati xabar berdi.
Maʼlum qilinishicha, fuqaro A.U. tegishli tartibda davlat ro‘yxatidan o‘tmasdan Farg‘ona viloyati O‘zbekiston tumani Qoratepadasht qishlog‘i hududidagi yashash xonadonida tijorat maqsadlarida noqonuniy ohak sexi tashkil qilib, tabiiy gaz tarmog‘iga o‘zboshimchalik bilan ulab, 69,4 mln so‘mlik 46,2 ming metr kub gazni yashirin ravishda o‘g‘irlagani aniqlandi.
Mazkur holat yuzasidan Jinoyat kodeksining 169-moddasi 2-qismi “d” bandi (o‘g‘rilik umumiy foydalanishdagi elektr, issiqlik, gaz yoki vodoprovod tarmoqlariga tijorat maqsadlarida o‘zboshimchalik bilan ulanish yoxud elektr energiyasini, tabiiy gazni, sovuq yoki issiq suvni hisobga olish asboblariga, shu jumladan ularning plombalariga qasddan shikast yetkazish yoxud hisobga olish asboblarining ko‘rsatkichlarini o‘zgartirish maqsadida ularga tashqaridan aralashish yo‘li bilan) bilan jinoyat ishi qo‘zg‘atilib, A.U. protsessual tartibda ushlangan.
Hozirda tergov harakatlari olib borilmoqda.
Izoh (0)