Qashqadaryo viloyati Muborak tumanida ekskavator sabab 4753 ta aholi va 65 ta ulgurji isteʼmolchi gazsiz qoldi. Bu haqda “Hududgaz Qashqadaryo” gaz taʼminoti filiali matbuot xizmati xabar berdi.
Keltirilishicha, yer qazishga mo‘ljallangan avtotransport vositasi haydovchisining ehtiyotsizligi natijasida yuqori bosimli gaz quvuriga shikast yetgan. Avariya holatini zudlikda bartaraf qilish maqsadida bugun, 20-fevral kuni soat 13:50 dan 17:00 ga qadar tumanning “Konchilar”, “Yoshlik”, “Do‘stlik”, “Tong”, “Bobur” va “Alisher Navoiy” mahallasidagi 4753 xonadon va yuqoridagi hududlarda joylashgan 65 ta ulgurji isteʼmolchida tabiiy gaz taʼminoti vaqtincha to‘xtatildi.
Taʼmirlash ishlari yakunlangandan so‘ng, taʼminot qayta tiklanishi taʼkidlangan.
Viloyatda bu kabi holat avval ham kuzatilgandi. Xususan, bir hafta avval, 12-fevral kuni viloyatdagi Karaktay gaz quvuri tarmog‘ining muhofaza maydonida noma’lum ekskavator tomonidan olib borilgan yer qazish ishlarini bajarish vaqtida gaz quvuriga shikast yetkazilgan. Shu munosabat bilan Qashqadaryo viloyatining quyidagi hududlaridagi 28 229 ta aholi va 716 ta ulgurji iste’molchilarda gaz ta’minot vaqtincha to‘xtatilgan.
Bundan tashqari, poytaxtda ham shu holat sodir bo‘lgan. Toshkent shahri Yakkasaroy tumani, Bobur ko‘chasida 8-noyabr kuni ekskavator yordamida qazish ishlari olib borilayotganda, ehtiyotsizlik oqibatida o‘rta bosimli gaz quvuriga shikast yetkazilgan. Natijada Yakkasaroy va Mirobod tumanlarida tabiiy gaz tarmog‘idan vaqtincha o‘chirilgan.
Izoh (0)