AQSH ma’muriyati Ukrainadagi foydali qazilmalarni qazib olish bo‘yicha kelishuvning “takomillashtirilgan” versiyasini Kiyevga yubordi. Bu haqda Axios xabar berdi.
So‘nggi kunlarda minerallar bo‘yicha kelishmovchilik AQSH va Ukraina munosabatlarida keskin burilish bo‘ldi. Prezident Donald Tramp ukrainalik hamkasbini Rossiya bilan urushni tanlagan “saylanmagan diktator” sifatida qoraladi, Zelenskiy esa bunga javoban uni Rossiyaning “dezinformatsiya”sini yutib yuborganlikda aybladi.
Ikki tomondagi manbalar endilikda AQSHga Ukraina minerallaridan foydalanishga ruxsat beruvchi bitim imzolanishini aytmoqda. Zelenskiy bitimning dastlabki versiyasi mamlakat manfaatlarini himoya qilmagani uchun vazirlarga mazkur hujjatni imzolamaslikni buyurgandi. Takomillashgan bitim shartlari Ukraina prezidentiga manzur kelishi kutilmoqda.
Manbalarga ko‘ra, hujjatga “sezilarli yaxshilanishlar kiritilgan” va u “Ukraina qonunchiligiga mos keladi”. Bitim “Zelenskiyning ayrim xavotirlarini hisobga olishi” qayd etilgan. Xususan, unda bitim Nyu York sudi yurisdiksiyasiga tegishli bo‘lishi haqidagi band chiqarib tashlangan. Boshqa tafsilotlar esa keltirilmagan.
Zelenskiyning bir nechta maslahatchilari unga Tramp bilan “yangi kelishmovchiliklardan qochish” va unga Ukrainani qo‘llab-quvvatlashni asoslash imkoniyatini berish uchun yangilangan hujjatni imzolashni maslahat berdi, deyiladi xabarda.
Milliy xavfsizlik bo‘yicha maslahatchi Mayk Vals Ukraina rahbari foydali qazilmalar masalasida “stolga qaytishi” kerakligini aytdi.
Bu muzokara. Muzokarada esa siz muzokara qilasiz. Ukraina foydali qazilmalar bo‘yicha muzokaralar olib bormoqchi, shuning uchun biz bu haqda gaplashyapmiz, dedi Oq uy rasmiysi.
Zelenskiy Ukraina mineral resurslarining 50 foiziga bo‘lgan huquqlarni AQSHga bermoqchi emas
Ukraina prezidenti tegishli kelishuvni imzolashdan bosh tortdi. U, shuningdek, AQSH vakillari bilan Ukraina konstitutsiyasiga muvofiq tayyorlangan tog‘-kon bo‘yicha kelishuv bo‘yicha o‘z taklifini muhokama qildi.
AQSH senatori Brayan Shats Ukraina prezidenti bilan uchrashuvdan so‘ng Trampning taklifini “yaxshilash zarurligini” aytdi, biroq tafsilotlar haqida gapirishdan bosh tortdi. U, Zelenskiyning “kelishuvning bir tomonlamaligi haqidagi da’volari adolatli” ekanini ta’kidladi.
Xavfsizlik kafolatlari evaziga Ukraina resurslaridan foydalanish
Trampning so‘zlariga ko‘ra, u Zelenskiy bilan Rossiya bilan bo‘lajak tinchlik shartnomasida xavfsizlik kafolatlari evaziga amerikalik investorlarga Ukrainadagi nodir metallar konlari va gaz konlariga kirish huquqini berish bo‘yicha 500 million dollarlik kelishuv tuzmoqchi.
G‘arbga Ukrainada foydali qazilmalarni qazib olish huquqini berish haqida Zelenskiy 2024-yil kuzida AQSH prezidentligiga o‘sha paytdagi nomzodlar Donald Tramp va Kamala Harrisga taqdim etgan “g‘alaba rejasi”da ham aytilgan.
3-fevral kuni Tramp bu variant haqida yana gapira boshladi, bu G‘arb siyosatchilari va ommaviy axborot vositalarida katta shov-shuvga sabab bo‘ldi. 7-fevral kuni Zelenskiy Reuters agentligiga bergan intervyusida AQSH Ukraina tabiiy resurslarini o‘zlashtirishda ustuvorlikka ega bo‘lishini, chunki “amerikaliklar hammadan ko‘proq yordam berganini” aytdi.
Izoh (0)