Mazkur klassik filmlar ekranga chiqqaniga ham bir necha o‘n yillardan oshdi. Bu vaqt ichida turli kino ishqibozlari ulardagi sezilarli xatolarni topibdi ham. Ammo komediyalarni tomosha qilishda ko‘pchilik payqamagan yana bir nechta noaniqliklar ham mavjud.
“Kavkaz asirasi yoki Shurikning yangi sarguzashtlari”
Tuzoqqa tushgan Nina xonadan chiqishga urinib, oyoq kiyimi bilan eshikka zarb bilan uradi. Eshik yuzasida tufli izlari qoladi, ammo keyingi kadrlarda ular yo‘qolganini ko‘rish mumkin.
Och qolgan Nina bulochka va mevalarni yeya boshladi, shu vaqtda Qo‘rqoq, Barzangi va Ahmoq unga qo‘shiq aytib, o‘ynay boshlaydi. Qahramonlar raqsga tushayotganda Nina juda qisqa vaqtda idishdagi deyarli barcha taomni yeb qo‘ygani ko‘rsatiladi.
“Omadli jentlmenlar”
Sahnalardan birida Dotsent sementdan butunlay qotib qolgan shimini tosh bilan ura boshlaydi. Kadrda uning yonida juda katta tosh ham borligi ko‘rishingiz mumkin. Ammo bir lahzadan keyin o‘sha tosh qayergadir g‘oyib bo‘ladi.
“Moskva ko‘z yoshlarga ishonmaydi”
Avvaliga Alentova ijro etgan qahramonning yonida sumkaning ochiq turganini ko‘ramiz, undan sharfning bir uchi chiqib turadi. Keyingi kadrda Gosha, so‘ng yana Katerina ko‘rsatiladi. Faqat bu safar uning yonidagi sumka allaqachon yopiq holatda namoyon bo‘ladi. Keyin qahramonlar o‘rtasidagi dialog boshlanganda o‘sha ro‘mol mo‘jizaviy tarzda yana sumkada paydo bo‘ladi.
Lyuda o‘ziga oro berayotgan paytda uning quloqlarida ko‘k sirg‘alar bo‘ladi, keyin ular oq ziraklarga o‘zgarib qoladi.
“Odam-amfibiya”
Ushbu filmda Gutiyerrening suvga sakrab tushishi va akula hujumi sahnasida bir xatolik bor. Hushsiz qolgan qiz suv tubiga cho‘kib, tuproqli yerga chalqanchasiga tushadi. Biroq keyingi kadrda u yonboshida yotgani ko‘rsatiladi. Ixtiandr uning oldiga suzib kelganida, qahramon yana chalqancha holatda va qumda emas, balki dengiz o‘tlari oldida ko‘rsatiladi.
“Qizlar”
Tosya juda och qolganidan katta non bo‘lagini yemoqchi bo‘lgandir, ehtimol. Ammo bir necha soniya ichida qo‘lidagi non uchdan ikkiga kamayishi reallikdan yiroq.
“Ishdagi ishq”
Syujetga ko‘ra, ayni paytda qahramon Lyudmila Kalugina (Alisa Freyndlix) kotiba Verochka (Liya Axedjakova) yordamida chiroyli qadam tashlashni o‘rganayotgan bo‘ladi. Xonaga notanish odamlar kirib kelganda, Kalugina shoshilib jigarrang pidjagini kiyadi, lekin tugmalarni qadashga ulgurmaydi.
So‘ng Kalugina tugmasi yopiq kiyimda Novoseltsev bilan suhbatlashgan kadr paydo bo‘ladi. Novoseltsev ot haykalini stolga qo‘yish vaqtida yiqilib tushadi. Shu vaqt Kalugina pidjak tugmalari qadalmagan holda unga yordam beradi.
Olga Rijova poyezdga ketayotganda qo‘lida soyaboni bo‘ladi. Ammo kadrlar o‘zgarishi bilan soyabonning tutqichi ham o‘zgarib qoladi. Avvaliga tomoshabin uning dumaloq ekanligini ko‘radi, keyin esa u cho‘zinchoq shaklda bo‘lib qoladi.
“Karnaval kechasi”
“Besh daqiqa” qo‘shig‘ini ijro etish paytida Lyudmila Gurchenkoning qahramoni soat orqasidan namoyon bo‘ladi. Bu vaqtda siferblatning ikki tomonida sahnada musiqachilar kuy chalib o‘tiradi. 9 raqamining yonida ikkita skripkachiga ahamiyat bering. Ularni yaqinroq kadrdan ko‘rsatganda yigitlar birdan surnaychiga aylanib, o‘rni ham almashib qolganining guvohi bo‘lasiz.
“Muhabbat va kabutarlar”
Filmda kinoafisha ortida shouga necha kun qolgani haqida ma’lumot berilgan. Ammo avvaliga 69 kun qolgani yozilgan stend kadr o‘zgarganidan so‘ng 65 kunga aylanib qoladi.
“Eng latofatli va jozibali”
Nadya blankalarni to‘ldirayotganida, uning oldida faqat sariq va yashil qog‘ozlar yotardi. Ammo kadr o‘zgarishi bilanoq qahramon yo‘q joydan oq qog‘oz ushlab turadi.
“Brilliant qo‘l”
Gesha Kozodoyev omadsizlik oroli haqida qo‘shiq kuylayotgan vaqtda, uning sochi jingalak bo‘ladi. Kadr o‘zgarganda esa sochlari tekis va taralgan holatda qo‘shiq aytayotgani tasvirlanadi.
Izoh (0)