AQSHning Texas shtatida xizmat qilgan 22 yoshli amerikalik harbiy Taylor Adam Li Rossiyaga mudofaaga oid maxfiy sirlarni yetkazishga uringanlikda gumonlanib, 6-avgust kuni hibsga olindi. Bu haqda Fox News xabar berdi.
AQSH Adliya vazirligiga ko‘ra, u iyun oyida Rossiya fuqaroligini olish evaziga “M1A2 Abrams” jangovar tanki va boshqa harbiy texnikalarga oid qimmatli ma’lumotlarni ruslarga taqdim etgan. Taylor Adam Li Qo‘shma Shtatlarning El-Paso shahridagi Fort Bliss harbiy bazasida xizmat qilgan va mudofaaga doir o‘ta maxfiy ma’lumotlardan xabardor bo‘lgan.
“AQSH mamlakatning zaif tomonlarini fosh qilganim uchun mendan xursand emas. Hozir Rossiyada bo‘lganimda, qo‘limdan kelgancha yordamimni ayamasdim”, degan Li.
Iyul oyida u o‘zini Rossiya hukumati vakili deb tanishtirgan shaxs bilan shaxsan uchrashib, unga SD-karta bergan. Unda ham “Abrams” tanki, boshqa zirhli texnikalar va jangovar amaliyotlarga oid hujjatlar bo‘lgan. Ayrim ma’lumotlar “nazorat ostidagi axborot” sifatida belgilangan bo‘lib, ularning tarqatilishi man qilingan edi.
Shuningdek, Li “Abrams” tanki ichidagi muhim texnik uskunani ham Rossiyaga yetkazmoqchi bo‘lgan. U 31-iyul kuni El-Pasodagi omborga ushbu uskuna deb gumon qilinayotgan narsani topshirgan va keyinchalik rossiyalik shaxsga xabar yuborgan: “Vazifa bajarildi”. FQBning qarshi razvedka bo‘limi direktori yordamchisi Roman Rojavskiy bu voqeaga shunday munosabat bildirgan:
“Bu — AQSHga xiyonat qilishni o‘ylayotgan har qanday shaxsga, ayniqsa, Vatanga sodiqlik qasamyodini qilgan harbiylarga ogohlantiruvchi signal”.
Izoh (0)