Gollivud yulduzi Bred Pitt oilasida og‘ir judolik sodir bo‘ldi — aktyorning onasi Jeyn Etta Pitt 2025-yil 5-avgust kuni 84 yoshida vafot etdi. Bu haqda aktyorning jiyani Sidni Pitt ijtimoiy tarmoqlarda e’lon qildi.
ABC News ma’lumotiga ko‘ra, voqea faqat bir necha kun o‘tgandan keyingina ma’lum bo‘lgan, chunki marhumaning oila a’zolari uni so‘nggi yo‘lga kuzatishda faqat yaqinlari ishtirok etishini istagan.
“Azizim Jeyn Etta, bizni tark etishingizga hali tayyor emas edik. Agar buvimni taniganingizda edi, uning qalbi naqadar mehrga to‘la ekanini darrov tushungan bo‘lardingiz. U har doim va hammaga chin dildan g‘amxo‘rlik qilardi. Menga rasm chizishni, kuchli bo‘lishni, odamlarga yumshoqlik bilan muomala qilishni va mayda narsalardan ham quvonch topishni o‘rgatgan”, deya xotirladi Sidni.
Jeyn Etta Pitt (qizlik familiyasi Hillhaus) 1940-yil 13-avgustda tug‘ilgan. U Missurining Springfild shahrida yashagan, kasbi bo‘yicha o‘qituvchi bo‘lgan. Uning turmush o‘rtog‘i Uilyam Alvin Pitt (Bill Pitt) yuk tashish kompaniyasida menejer bo‘lib ishlagan. Ular 1962-yilda turmush qurishgan va uch farzandni — Bred, Dag va Julini voyaga yetkazgan.
Bred Pitt onasini ko‘plab yirik tadbirlarga olib chiqqan, jumladan, 1996-yilda “Iblis mulki” (“The Devil’s Own”) premyerasi, 2012-yilgi Oskar mukofotlari marosimi va 2014-yilda “Yengilmas” (“Unbroken”) filmi taqdimotiga birga tashrif buyurgan.
Hozircha Bred Pitt bunga hech qanday izoh bermadi — aktyor sukut saqlagan holda motam tutmoqda.
Izoh (0)