O‘zbek tomoshabinlariga “Qalbim chechagi” serialidagi Yun Xi obrazi bilan yaxshi tanish bo‘lgan aktrisa Chxve Jin Silni ko‘pincha Janubiy Koreyada “milliy aktrisa” deb atashadi. Chxve Jin Sil to‘liq bo‘lmagan kambag‘al oilada, onasi va ukasi bilan yashagan. U bolaligidan mashhur aktrisa bo‘lishni orzu qilardi.
Chxve maktabni tugatganidan so‘ng model bo‘lib ishlay boshladi. Uning Samsung reklamasida ijro etgan sadoqatli uy bekasi obrazi keng jamoatchilik e’tiboriga tushdi hamda uni butun Koreyaga mashhur qildi.
1988-yilda Chxve aktrisalik faoliyatini boshladi hamda “Chosonning 500 yilligi” doramasida ikkinchi darajali rolni ijro etdi. Ikki yildan so‘ng u “Janubiy Koreyadagi Shimoliy koreyalik partizan” filmida bosh rolni ijro etdi. 1997-yilda taqdim etilgan “Qalbim chechagi” seriali uni butun dunyoga mashhur qildi. Serial nafaqat Janubiy Koreya, balki bir nechta xorijiy mamlakatlarda katta qiziqish bilan tomosha qilindi, undagi qo‘shiqlar esa tomoshabinlar qalbidan munosib joy egalladi.
Chxve o‘zining 20 yillik karyerasi mobaynida 18 ta film va 20 ta dorama, shuningdek, 140 ta reklama roligida suratga tushdi. Chxve “Eng yaxshi aktrisa” sifatida “Grand bell” mukofotini ham qo‘lga kiritgan.
Shaxsiy fojialar
Biroq Chxvening yorqin karyerasiga shaxsiy hayotdagi ketma-ket fojialar soya sola boshladi. Chxve so‘nggi qadamni tashlashga undagan “zaharli” virtual mish-mishlar, kiberqo‘rqitish qurboniga aylandi.
1994-yilda aktrisaning sobiq menejeri, kino sanoatidagi nufuzli shaxs Pe Byon Su aktrisaning gastrollar bo‘yicha menejeri tomonidan o‘ldiriladi. Chxve guvoh sifatida tergovga jalb qilinadi, biroq odamlar o‘rtasida uning ham ushbu qotillikka aloqador ekani haqida gap-so‘zlar tarqaladi. Ushbu gap-so‘zlar asossiz bo‘lsa-da, aktrisaning jamiyatdagi imijiga putur yetadi. 1995-yilda aktrisa jiddiy yo‘l-transport hodisasiga uchraydi va tez-tez ta’qib qurboniga aylana boshlaydi. 1996—1998-yillarda aktrisani o‘g‘irlamoqchi bo‘lishadi.
Zo‘ravon er
2000-yilda Chxve Jin Silning professional beysbolchi Cho Son Min bilan nikohi Janubiy Koreyadagi eng ko‘p muhokama qilingan mavzuga aylandi. Juftlik 2001-yilda o‘g‘il farzand ko‘rishdi hamda unga Xvan Xi deb ism qo‘yishdi. 2003-yilda ularning oilasida Jun Xi ismli qiz farzand dunyoga keldi. Ularning turmushini baxtli deb atab bo‘lmasdi.
Butun nikoh davomida Cho OAVni rafiqasini yomon uy Bekasi sifatida ko‘rsatish uchun ishlatib kelgan. Biroq oiladagi muammolarda aybdor uning o‘zi edi. Cho aktrisaga bir necha marta xiyonat qilgan, shuningdek aktrisaning onasidan katta miqdorda qarz bo‘lgan. Bundan tashqari beysbolchi Chxveni tinmay haqorat qilar, hatto 2002-yilda u ikkinchi farzandiga homilador bo‘lgan paytda unga qo‘l ham ko‘targan. Biroq Cho OAVga ushbu janjalni rafiqasi boshlagani haqida so‘zlab bergan. 2004-yilda Chxve yana bir bor turmush o‘rtog‘i tomonidan kaltaklangan. O‘sha yilning sentabrida esa juftlik ajrimga hujjat topshiradi.
Bu paytga kelib, Chxve zo‘ravon turmush o‘rtog‘ining ustidan tegishli tashkilotlarga arz qilgan edi. Biroq farzandlari uchun vasiylikni qo‘lga kiritish uchun erining ustidan yozgan shikoyat arizasini qaytib olgan, shuningdek uning onasidan olgan qarzlaridan ham voz kechadi.
Ajrim jarayonida aktrisa farzandlariga vasiylik qilish huquqini qo‘lga kiritadi, biroq uning eriga ham farzandlari bilan ko‘rishib turish imkoniyati beriladi.
Aktrisaning zo‘ravon eri ajrimdan keyin ham uni tinch qo‘ymaydi. U OAV orqali aktrisa haqida turli bo‘htonlarni yog‘dirib, uni obro‘sizlantirishga harakat qiladi. Chxve uning bu ishlariga shunchaki qarab tura olmaydi hamda 2004-yilda o‘zini oilaviy zo‘ravonlik qurboni deya e’lon qiladi. Biroq qilmishi uchun u taskin emas, balki yanada qat’iyroq jazo oladi.
O‘sha vaqtda aktrisa Shinhan Engineering and Construction brendining ambassadori edi. Biroq u eri tomonidan kaltaklangani aks etgan suratlarini OAVda chop ettirganidan so‘ng kompaniya yuzlari shilingan va shishib ketgan holatda ko‘ringani uchun “omma oldida o‘zini munosib tuta olmaganlikda” aybladi hamda aktrisa bilan hamkorlikni to‘xtatdi. Shuningdek kompaniya Chxvedan shartnomani buzganlikda ayblab, tovon puli talab qildi, biroq aktrisa ushbu ishda g‘olib chiqdi.
Karyeraning qayta tiklanishi
2005-yilda “Mening pushtirang hayotim” serialidagi ishtiroki uning karyerasini qayta tikladi. Ushbu serial tomoshabinlar va tanqidchilarning yuqori e’tiroflariga sabab bo‘ldi.
Aktrisa 2008-yilda “So‘nggi mojaro” doramasida yana bir muvaffaqiyatli rolni ijro etdi. Dorama nafaqat Janubiy Koreya, balki butun dunyoda mashhurlikka erishdi. Prodyuserlar uning ikkinchi mavsumi ham moliyalashtirilishini ma’lum qildi. Biroq Chxve doramaning ikkinchi mavsumida suratga tushishga ulgurmadi…
Yana bir tuhmat
2008-yilning sentabrida mashhur komik aktrisa Chon Son Xining turmush o‘rtog‘i An Je Xvan o‘z mashinasida o‘lik holda topiladi. U katta qarz tufayli kelib chiqqan stress oqibatida o‘z joniga qasd qilgan. Chxve marhumning rafiqasi Chonning yaqin dugonasi edi. Shuning uchun dafn marosimida Chxve dugonasi uchun qayg‘uda ekanligini namoyon etdi. Biroq dafn marosimidan so‘ng internetda marhum aktrisadan foizga pul olib turgani, shu sabab ham uning o‘limida Chxvening aybi bor ekanligi haqida gap-so‘z tarqaldi. Chxve ushbu gap-so‘zlarni kim tarqatganini aniqlashtirish maqsadida politsiyaga murojaat qiladi. Oxir-oqibat politsiya ushbu mish-mishlarni tarqatgan qo‘riqlash kompaniyasi xodimini qo‘lga oladi.
So‘nggi qadam
Aktrisa hayotida yuz berayotgan muttasil stresslarga ortiq toqat qila olmaydi. 2008-yilning 2-oktabr kuni aktrisa o‘z uyidan osilgan holda topiladi. Uning o‘limidan so‘ng mamlakatda o‘z joniga qasd qilish holatlari keskin ortib ketadi. Yonsey universiteti qoshidagi Severans ruhiy kasalliklar shifoxonasi psixiatri Min Son Gilning aytishicha, Chxvening o‘limi Verter effektini yuzaga keltirib, mamlakatdagi suitsidlar 16,23 foizga ortib ketgan.
O‘limidan keyin ham tinch qo‘yilmagan aktrisa
O‘limidan keyin ham Chxve bir necha marta hurmatsizlikka duch keladi. 2009-yilning 4-iyunida mamlakat oliy sudi Shinxan kompaniyasi tomonidan Chxvega nisbatan ayblovni asosli deb topadi. Qayta ko‘rib chiqilgan ish bo‘yicha, Chxve o‘zini oilaviy zo‘ravonlik qurboni sifatida ko‘rsatib “ijtimoiy sharafiga mos ish tutmaganlikda” aybdor deb topiladi. Ushbu qaror chiqarilganidan bir oy o‘tib 2009-yilning 15-avgustida Chxvening hoki u dafn qilingan joydan o‘g‘irlab ketiladi.
Politsiya o‘g‘rini izlab topadi, u aktrisaning hokini uyidagi chiqindi idishiga tashlagani aniqlanadi. Shu tariqa Chxvening hoki Gapsan parkidagi yangi qabrga qo‘yiladi. Hozirda ushbu maskanda Chxvening sharafiga kichik xotira bog‘i barpo etilgan.
Chxvening o‘limidan ko‘p o‘tmay, uning ukasi va menejeri ham o‘z joniga qasd qilgan. Aytilishicha, aktrisaning o‘limi ularga qattiq ta’sir ko‘rsatgan. Oradan to‘rt yil o‘tib, uning sobiq eri Cho Son Min ham suitsid orqali hayotdan ko‘z yumgan.
Izoh (0)