Epizodlari 60–90 soniya davom etadigan o‘ta qisqa mini-seriallar TikTok’da mashhur bo‘lib bormoqda. Bunday loyihalarning formati juda oddiy ko‘rinishi mumkin, ammo seriallar professional rejissyorlar tomonidan ishlab chiqilmoqda. Xitoyda urf bo‘lgan bir daqiqalik mini-dramalar qiziqarli syujet va kliffhengerlarga boydir.
Kliffhenger (ing. cliffhanger) — bu hikoya, film, serial yoki maqola oxirida qoldiriladigan kutilmagan va hal qilinmagan vaziyat. Uning asosiy maqsadi — tomoshabin yoki o‘quvchini keyingi qismni kutishga undashdir.
Xususan, 2023-yilda “Milliarder erimning qo‘shaloq hayoti” deb nomlangan shou ijtimoiy tarmoqda eng taniqli va katta daromad keltirgan loyiha bo‘ldi. Mini dramada onasi davolash uchun puldor, ammo sobiq sudlangan erkakka turmushga chiqishga majbur bo‘lgan ayol haqida hikoya qilinadi. Serial 49 qismdan iborat bo‘lib, ularning har biri uzog‘i bilan bir daqiqa davom etadi. Izohlarda esa minglab foydalanuvchilar yangi epizodni imkon qadar tezroq joylashtirishni so‘rashadi.
Bunday mini-seriallar hozirda faqat Xitoyda ishlanmoqda. Bloomberg nashri ma’lumotlariga ko‘ra, 2024-yilda ana shunday qisqa dramalardan tushgan daromad 35 foizga o‘sgan. Shu kabi kontent yaratuvchilari 50,44 milliard yuan (6,91 milliard dollar) ishlab olgan. Ushbu ko‘rsatkich kinoteatrlarning kassa daromadidan yuqori hisoblanadi.
Xitoyning yarim milliarddan ortiq internet foydalanuvchilari har kuni bunday ko‘rsatuvlarni tomosha qiladi. “Milliarder erimning qo‘shaloq hayoti” filmi muallifi, ReelShort bosh direktori Joi Jia shunday deydi:
“Men yaqin kelajakda mini-dramalar ko‘ngilochar shoular orasida eng mashhur loyiha shakliga aylanishiga ishonaman. Fikrimcha, bir necha yil ichida ular an’anaviy kino bozorini ortda qoldiradi”.
Epizodi bir necha sekund davom etadigan seriallar birinchi marta Xitoyda 2018-yilda paydo bo‘lgan va hozirda mamlakat yiliga 5000 dan 8000 gacha yangi seriallarni ishlab chiqaradi. Raqobat tobora oshib borayotgani tufayli seriallarni yaratish xarajatlari ham ortib bormoqda, ammo hozircha bu standart filmlardan kamroq xarajat talab etmoqda.
Izoh (0)