Ko‘pchilik multfilm tomosha qiladi, lekin ular qanday yaratilganini hamma ham bilavermaydi.
Animatsiya animatikadan boshlanadi
Multfilmning o‘zini chizishdan oldin, uning yaratuvchilari ssenariyni animatikaga — bo‘lajak rasmning video eskiziga aylantiradi. Aslida, bu yaxlit syujet, kompozitsiya, yirik planlar, qahramonlar harakatini ko‘rishga yordam beradigan videoqoralama.
Rassomlar animatsiyaga asoslangan rasmni qayta chizish bilan shug‘ullanayotganda, musiqachilar saundtrek yaratish ustida ishlaydilar. Bu qism tugagach, material personajlarga ovoz beruvchi aktyorlarga va vizual effektlarni qo‘shuvchi grafik dizaynerlarga topshiriladi. Multfilmni yaratishning so‘nggi bosqichida unga qadam tovushlari, ko‘cha shovqini va boshqa effektlar qo‘shiladi.
Multfilmlar uzoq vaqt talab etadi
Multfilmlar ishlab chiqarish jarayonidagi ko‘plab bosqichlar tufayli juda uzoq vaqt talab etadi. Masalan, “Valli” 14 yil mobaynida yaratilgan, “Rapunzel” esa 8 yil vaqt olgan. Shahzodaning suv parisi tomonidan qutqarilishi sahnasi atigi ikki daqiqa bo‘lsa-da, uni chizish bir yildan ortiq vaqt talab etgan. Buyuk Xayao Miyazaki esa yiliga faqat 12 daqiqalik film yaratishga qodir bo‘lgan.
Albatta, so‘nggi yillarda jarayon sezilarli darajada tezlashgan bo‘lsa-da, baribir ancha vaqt talab etadi. Masalan, “Telba koinot” turkumini yaratish uchun 2 haftadan 4 haftagacha vaqt ketadi. Ish ssenariy va animatik bilan boshlanadi, keyin aktyorlar dastlabki ovozlashtirishni amalga oshiradi, shundan so‘ng animator qo‘lda personajlarning har bir harakatini chizib chiqadi. Yakuniy bosqichda musiqa, tovush dizayni, oldindan ko‘rish va seriya tavsifi yaratiladi.
Barmoqlardan tejab qolish
Multfilm yaratish uzoq, sinchkovlik talab qiladigan va shu bois juda qimmatga tushadigan jarayondir. Buning ustiga, multfilmlar doimo superqahramonlar haqidagi filmlar va boshqa fantastik asarlardan qimmatga tushib kelmoqda. Tasavvur qiling: “Rapunzel” uchun “Avatar”ga nisbatan 23 million dollar ko‘proq mablag‘ sarflangan — jami xarajatlar 260 million dollarni tashkil etgan.
“Super oila 2,“ “Do‘rini izlab,“ “O‘yinchoqlar tarixi,“ “Maxluqlar uyushmasi” va “Mashinalar” filmlari esa “Terminator,“ “Doktor Strenj,“ “Kruella”, shuningdek, “Dedpul” va “Rosomaxa” filmlarining byudjetidan oshib ketdi!
Hatto minimalistik uslubli oddiy ko‘rinishdagi multseriallar ham arzon emas. Xarajatlarni biroz bo‘lsa-da kamaytirish uchun studiyalar bir hiyla o‘ylab topishdi. Uolt Disney tashabbusiga ergashib ular o‘z qahramonlarining beshinchi barmog‘ini chizishni to‘xtatdi — bu qaror millionlab dollar va minglab daqiqani tejashga yordam berdi.
Matematiklar, aktyorlar, olimlar ham multfilm ijodkorlari
Multfilmlar ustida nafaqat ssenariy mualliflari, rejissyorlar va animatorlar, balki boshqa ko‘plab mutaxassislar ham mehnat qilishadi. Misol uchun, aktyorlar ko‘pincha animatorlar oldida qahramonlarning harakatlarini va yuz ifodalarini haqiqatga yaqin tarzda aks ettirish maqsadida sahnalarni ijro etishadi. Matematiklar esa dengiz, qor va sochlarni ishonchli tarzda jonlantirishga yordam beradigan dasturiy taʼminotlar yaratishadi.
Multfilmlar ustida ishlashda dublyaj aktyorlariga alohida eʼtibor beriladi. Ko‘pincha ular mikrofon oldida personajlarning harakatlarini takrorlashiga — yugurish, sakrash, raqs tushish, o‘ynoqlash va hatto baqirishga to‘g‘ri keladi.
Shu bilan birga, agar multfilm mavzusi murakkab bo‘lsa, mualliflar vaqti-vaqti bilan shifokor va olimlardan maslahat so‘rab murojaat qilishadi. Mutaxassislardan olingan maʼlumotlar hodisalarni ishonchli tarzda tasvirlashga va multfilmlarni chinakamiga maʼrifiy qilishga yordam beradi.
So‘nggi fakt
“Animatsiya” so‘zi lotinchadan tarjima qilinganda “jonlantirish, hayot berish” degan maʼnoni anglatishini bilarmidingiz? Demak, animatorlar, aslida, jonsiz chiziqlar, shakllar va ranglarga jon baxsh etib, ularni do‘stlarga, hamrohlarga, ustozlarga va sevimli qahramonlarga aylantiradilar. Multfilmlarning sehri ham aynan shunda yashiringan bo‘lsa kerak.
Izoh (0)