Koreya shou-biznesida Son Xe Gyo eng talabgir aktrisa hisoblanadi. U vatanidan tashqarida ham shuhrat qozongan. Uning ishtirokidagi ko‘plab dramalar nufuzli mukofotlarga sazovor bo‘lgan. Yulduzning tarjimayi holi, shaxsiy hayoti va karyerasidagi yutuqlari haqida ma’lumot beramiz.
Tarjimayi holi va shaxsiy hayoti
Aktrisa 1981-yil 22-noyabrda tug‘ilgan. Ammo uning tug‘ilganlik to‘g‘risidagi guvohnomasida boshqa sana — 1982-yil 26-fevral ko‘rsatilgan. Chunki Son tug‘ilganda shifokorlar uning tirik qolmasligiga ishonchlari komil bo‘lgan. Biroq uch oylik davolanishda so‘ng qizaloq tuzalib ketadi. Shundan keyingina ota-onasi yangi tug‘ilgan chaqaloqni ro‘yxatga olishadi.
Shuhrat sari yo‘l
Son Xe Gyoning otasi va onasi u hali yoshligida ajrashishgan. Onasi qizi bilan Seulga kelib, Kannam tumaniga joylashadi. 1980-yillarda bu yerga ko‘plab nufuzli maktablar ko‘chib o‘tgandi. Song Xe Gyo ulardan biri — Ewha qizlar o‘rta maktabiga qabul qilinadi.
Tatler Asia nashriga ko‘ra, u bolaligida figurali uchuvchi bo‘lishni orzu qilgan, hatto mazkur sport bilan shug‘ullanishni boshlagan. 1996-yilda 14 yoshli Son tanlovda g‘olib chiqqach, maktab formasi modeliga aylanganida hammasi o‘zgarib ketadi. U e’tiborga tushadi va “Birinchi sevgi” (1996-1997) dramasida kichik rol o‘ynashga taklif qilinadi. Shundan keyin boshqa filmlarda ham ishtirok etadi, shu bilan birga Son Xe Gyo Sejong universitetida o‘qishni davom ettirib, kino san’ati bo‘yicha diplom oladi.
Shaxsiy hayoti
Mashhur koreyalik aktrisaning shaxsiy hayoti va turmush o‘rtog‘i kimligi har doim muxlislar va jurnalistlarda qiziqish uyg‘otadi. South China Morning Post Son Xe Gyoning munosabatlari bo‘lgan deb taxmin qilingan erkaklarni sanab o‘tgan. Ammo aktrisa faqat uchta erkak bilan bo‘lgan munosabatlarini rasman tasdiqlagan. Bular:
Li Byon Xon. Son va Li uchrashib yurganlarini ochiq tan olishadi. 11 yillik yosh farqi va Lining og‘ir fe’l-atvoriga qaramay, munosabatlar 2003-yildan 2004-yilgacha davom etgan.
Xyon Bin. Rasmiy ravishda tasdiqlangan Son va Xyon o‘rtasidagi yaqin munosabatlar 2008-yildan 2011-yilgacha davom etgan. Xyon armiyaga chaqirilgandan keyin hammasi tugagan.
Son Chjun Ki. 2016-yilda u Son Xe Gyo bilan uchrashib yuradi. Juftlik bir yil davomida munosabatlarni yashirgan bo‘lsa-da, dabdabali to‘y qilib muxlislarni hayratda qoldiradi. Ammo mazkur nikoh ikki yildan kamroq davom etadi, 2019-yilda er-xotin ajrashganliklarini e’lon qilishadi. O‘shanda ko‘plab OAVlar ajralish sababini xarakterlardagi farq deb ataganini yozgan edi.
2023-yil boshidan beri Son Xe Gyo idol va aktyor Cha In U bilan uchrashayotgani haqida mish-mishlar tarqalgan. Bu taxminga YouTube’da e’lon qilingan shubhali video sabab bo‘lgan. Ammo KDramaStars va KBIZoom bu mish-mishlarni rad etgan.
Karyerasi
O‘ynagan rollari aktrisaga olamshumul shuhrat va ko‘plab mukofotlarni olib kelgan. Sonning eng yaxshi kartinalari orasida Jon Vuning “Tajovuz” (2014) tarixiy melodramasi ham bor. Bu film beshta mukofotga sazovor bo‘lgan, shu jumladan Hong Kong Film Awardsga ham. Soompi nashrining yozishicha, mazkur film Xitoyda kassa yig‘imlari bo‘yicha yetakchiga aylangan.
Son Xe Gyo qaysi filmlarda suratga tushgan?
Soompi nashri Son Xe Gyo ishtirok etgan bilan eng yaxshi seriallarni sanab o‘tadi. Ular qatoriga quyidagi loyihalar kiradi:
“Kuz ertagi” (2000). Son Xe Gyo bu doramada Yun In So rolini o‘ynaydi, u asrab olingan qiz ekanini bilib qoladi. U haqiqiy onasining oldiga qaytish uchun o‘gay akasi Yun Chjun So (Son Sin Xon)dan ajralishiga to‘g‘ri keladi. Yillar o‘tgach, ular uchrashishadi va bir-birlarini sevib qolishadi.
“Mehmonxona” (2001). Serialda Seuldagi mehmonxona haqida hikoya qilinadi, bosh direktor o‘limidan keyin uning bevasi mazkur mehmonxonani saqlab qolishga harakat qiladi. Son Xe Gyo mehmonxonani egallashga urinayotgan Kim Bokmanning (Xan Jin Xi) qizi Kim Yun Xi rolini o‘ynaydi.
“Va-bank” (2003). Professional qimorboz Kim In Xa (Li Ben Xon) Min Su Yenga (Son Xe Gyo) oshiq bo‘lib qoladi. U Min Su Yen otasining o‘limida aybdor bo‘lgan jinoyatchini o‘ldirganidan keyin qamoqqa tushadi. Yetti yildan keyin taqdir ularga qayta birga bo‘lish imkoniyatini beradi.
“To‘liq uy” (2004). Son Xe Gyo va Chon Ji Xun turli xarakterdagi yoshlarni o‘ynaydi. Ular o‘zlari istamagan holda bir tom ostida yashashga majbur bo‘lishadi. Asta-sekin nafrat haqiqiy muhabbatga aylanadi.
“Bu qishda shamol esadi” (2013). Yomon yigit O Su (Cho In Son) ko‘zi ojiz qiz O Yonga (Son Xe Gyo) oshiq bo‘lib qolishi haqidagi romantik drama. Garchi ular bir-biridan juda farq qilsa-da, bir-biriga bo‘lgan kuchli ehtiyoj qahramonlarni muhabbat sari yetaklaydi.
“Quyosh avlodlari” (2016). Bu armiya kapitani (Son Chjun Kia) va shifokor (Son Xe Gyo) o‘rtasida yuzaga kelgan sevgi hikoyasidir.
Hozirgacha Son Xe Gyo 26 ta serial va 11 ta filmda rol o‘ynagan. U yettita teleko‘rsatuvda ishtirok etgan va uchta musiqiy klipda suratga tushgan.
Hozirda nimalar bilan band?
Son Xe Gyo faol rol o‘ynashda davom etmoqda. Deyarli har yili uning ishtirokida yangi dorama chiqadi. Aktrisaning eng yangi loyihalari orasida ikkita serialni eslatib o‘tish kerak:
“Endi xayrlashamiz” (2021-2022). Son Xe Gyo shuhratparast dizayner Xa Yon In rolini o‘ynaydi. U brendni dunyoga tanitmoqchi va faqat ish haqida o‘ylaydi. Chan Ki Yong mashhur fotograf Yun Chje Guk rolini ijro etadi. Ular o‘rtasida paydo bo‘lgan sevgi-muhabbat og‘ir ajralish bilan tugaydi, ammo taqdir hamma narsani o‘zgartirish imkoniyatini beradi.
“Shon-sharaf” seriali 2022-yilda Netflix’da chiqdi va Son Xe Gyoning eng yaxshi loyihalaridan biriga aylandi. U yuqori maktabda shafqatsiz zo‘ravonlikka uchragan Don In rolini o‘ynaydi. Voyaga yetgan ayol qasos olishni istaydi.
Ushbu ikki loyiha yulduz karyerasidagi oxirgisi emas albatta. Son Xe Gyo koreys kinosining jonli afsonasiga aylandi. Uning har bir qadamini millionlab muxlislar kuzatib boradi. Ular yulduz ishtirokidagi dorama va filmlarni sabrsizlik bilan kutishadi.
Izoh (0)