Natalya Krachkovskaya — sovet filmlarini tomosha qilgan har bir kishi taniydigan aktrisalardan biri. Beg‘ubor tabassum va yaxshi kayfiyat har doim odamlarni o‘ziga jalb qilgan, ammo ular orasida hasadgo‘ylar ham ko‘p edi. Natalya tegishli maʼlumoti bo‘lmay turib, katta kinoga kirib borganida, ular unga har xil yo‘llar bilan xalaqit berishardi. Bunday paytlarda uni eri Vladimir Krachkovskiy hamisha qo‘llab-quvvatlardi.
Fojia ketidan fojia
Natalya 1938-yilda aktrisa Mariya Fonina va mayor Leonid Belogorsev oilasida tug‘ilgan. Urush boshlanishi bilan otasi oilasini tashlab, frontga ketishga majbur bo‘ladi. Yaqinlaridan ayrilganiga qaramay, Leonid Belogorsev ham otasining izidan borishni xohladi, u butun umr harbiy ish bilan shug‘ullangan va imperator Nikolay II ning shaxsiy qo‘riqchiligida xizmat qilgan. Mayor Germaniyaga yetib borishga muvaffaq bo‘ldi, ammo qaytib kelmadi: 45-yilda Mariya Fonina uning vafoti haqida xabar oldi.
Teatr aktrisasi ikki qizining tarbiyasi va taʼminotini o‘z qo‘liga olishiga to‘g‘ri keldi. O‘shanda Natalya yetti yoshda edi, u hamma vaqt hovlida o‘g‘il bolalar bilan o‘ynar va serharakatligi bilan ajralib turardi. Kichik singlisi Irina esa yoshi tufayli doimiy nazoratga muhtoj edi va shunda qizlarning buvisi yordamga keldi. U Natalyani ko‘rib, qanday qilib bo‘lsa ham qizaloqni semirtirishni o‘z oldiga maqsad qilib qo‘ydi: qizgina tug‘ilganidan zaif va ozg‘in edi, urush yillarida esa ahvol yanada yomonlashdi.
Nevarasi o‘n yoshga to‘lganida semirib, yuzlari qip-qizil bo‘lib, buvisini xursand qilardi. Sinfdoshlar ham har doim ularning kayfiyatini ko‘tarib, biror mavzuni batafsil tushuntirib bera oladigan mehribon qizni yaxshi ko‘rishardi. Belogorseva yaxshi o‘qirdi, ayniqsa, tarixni yaxshi ko‘rardi. Qarindoshlari Natashaning maktabni bitirgach, tarix-arxiv institutiga hujjat topshirmoqchi ekanini eshitib, umuman hayron bo‘lishmadi. Onasi bunday tanlovdan hammadan ko‘ra ko‘proq xursand bo‘ldi: Mariya Fonina qizi aktrisa bo‘lishini istamasdi va qizchasi u bilan ko‘p vaqtini sahna ortida o‘tkazib, hayotini ijod bilan bog‘lashni xohlab qolishidan xavotirda edi.
Uning qo‘rqqani baribir sodir bo‘ldi. Natalya onasidan yashirincha ikkita institutga hujjat topshirdi va ikkinchisi aynan kinematografiya instituti edi. Natalyaning tanlovi oson kechdi: Vladimir Belokurov abituriyent qizning soddaligi va o‘ziga ishonchiga shunchalik qoyil qoldiki, uni darhol o‘z kursiga qabul qildi.
O‘shanda bo‘lajak aktrisa onasi bilan qattiq janjallashdi, onasi qizining qaroriga qarshi chiqdi va bunday qomat bilan hech qachon mashhurlikka erisholmasligini aytdi. Ammo Natalya to‘lacha qomati aynan uning o‘ziga xos jihati ekanligiga va bu u uchun hech qanday noqulaylik tug‘dirmasligiga ishonchi komil edi.
Natalyaga institutni tugatish nasib qilmadi. O‘qishni boshlaganidan bir necha oy o‘tgach, u jiddiy baxtsiz hodisaga uchradi va ko‘rish qobiliyatidan mahrum bo‘lishiga bir baxya qoldi. Shifokorlar Natalyaga o‘qishni davom ettirishni qatʼiyan taqiqladi, shuning uchun u tez orada o‘qishdan haydaldi. Buvisi yana nevarasini parvarish qilishni boshladi: atigi bir-ikki yil ichida u qizni oyoqqa turg‘azdi va hali ham sahnani orzu qilayotgan qiz kastinglarga qatnay boshladi. U sanʼatkor bo‘lish fikridan voz kechmadi, maxsus maʼlumoti bo‘lmasa-da, hayotini suratga olish maydonchasi bilan bog‘lashga qaror qildi.
Chinakam baxtning chorak asri
Ehtimol, Natalyani suratga olish maydoni shunchalik tortganining sababi, aynan o‘sha yerda uni muhabbat kutayotganini oldindan sezgani bo‘lsa kerak. Belogorseva ommaviy sahnalarda chiqishni boshladi, keyinchalik esa kichik epizodik rollarni oldi. Aktrisa bunday yutuqlardan ham xursand edi: hatto o‘n yillar o‘tgach ham, Natalya ahamiyatsiz personajlar bo‘lmasligini taʼkidlardi. Loyihalardan birida uning hayoti butunlay o‘zgarib ketdi: “Toshqin” filmini suratga olish paytida u ovoz rejissyori Vladimir Krachkovskiy bilan tanishdi.
Bir qarashda, ko‘zoynak taqqan ko‘rimsizgina erkak — buning ustiga bo‘lajak aktrisadan o‘n besh yosh katta — hech qanday imkoniyatga ega emasdi. Natalya har doim qarama-qarshi jins vakillari orasida mashhur bo‘lgan: o‘zini ko‘rsatish qobiliyati, o‘ziga ishonchi va samimiyligi unga boshqalardan ajralib turishga imkon bergan. Biroq Krachkovskiy raqobatdan qo‘rqmadi va go‘zal qizning muhabbatini qozonish uchun kurashishga qaror qildi.
U Natalyaning nozik tomoni — ovqatdan foydalandi. Bir kuni Vladimir aktrisani yangi pishirilgan kulchalar bilan mazali nonushta tayyorlab uyg‘otdi va uning reaksiyasini ko‘rib, har tong shunday qila boshladi. Tabiiy ravishda, qiz o‘ziga ko‘rsatilgan bunday g‘amxo‘rlikni eʼtiborsiz qoldira olmadi va rejissyorning iltifotlariga javob qaytardi. Natalyani 15 yosh farq mutlaqo o‘ylantirmasdi: Vladimirning tortinchoqligi uni qiziqtirar, bundan tashqari, u kino arbobi yonida o‘zini har qachongidan-da baxtliroq his etardi.
Ammo sanʼatkorning onasi ularning turmush qurishiga keskin qarshi chiqdi. U qizining o‘zidan ancha katta erkak bilan baxtli bo‘lishiga ishonmasdi. Vladimirning qarindoshlari ham xuddi shunday fikrda edi, ular “yosh bolani” nima uchun uyga olib kelganiga tushunmasdi. Sevishganlar boshqalarga quloq solmaslikka qaror qilishdi va shunga qaramay, munosabatlarni “Toshqin” filmini suratga olish tugashidan oldin rasmiylashtirdilar.
1963-yilda Natalya va Vladimir oilasida Vasiliy ismli o‘g‘il tug‘ildi. U otasining izidan borib, ovoz rejissyori bo‘lishga qaror qildi. Uning ko‘z o‘ngida doimo yorqin muhabbat namunasi namoyon bo‘lardi: Krachkovskiy turmushi davomida rafiqasiga har kuni nonushtaga yangi kulchalar olib kelardi, unga g‘amxo‘rlik qilar va janjallashishga bo‘lgan urinishlarga ajoyib sabr-toqat bilan munosabatda bo‘lardi. Bundan tashqari, Vladimir sevgilisining karyerasiga ham ko‘maklashdi: uning yordami tufayli Natalya Leonid Gaydayning filmida Gritsatsuyeva xonim rolini oldi. Bu aktrisa va rejissyor o‘rtasidagi uzoq davom etgan hamkorlikning boshlanishi bo‘ldi. “Ivan Vasilyevich kasbini o‘zgartiradi” filmidagi Ulyana Andreyevna obrazi Natalyaning uning naqadar serqirra aktrisa ekanligini namoyon etgan.
Natalya Krachkovskayaning eri vafotidan keyingi hayoti
Krachkovskiy Natalya ellik yoshga kirganda vafot etdi. Sevimli turmush o‘rtog‘ini yo‘qotish aktrisa uchun og‘ir zarba bo‘ldi, unga faqat nabirasi Volodyaning tug‘ilishi taskin berdi. Natalya erkaklar orasida mashhur bo‘lishiga qaramay, boshqa turmush qurishga jurʼat eta olmadi. Krachkovskayaning tan olishicha, unga bir necha marta taklif bo‘lgan, lekin u har doim rad javobini bergan, boisi Vladimirga o‘xshaganlar baribir endi yo‘q edi.
Shaxsiy hayot o‘rniga aktrisa o‘g‘li, nabirasi va karyerasiga butun eʼtiborini qaratdi. Hatto yurak muammolari tufayli og‘ir ahvolda bo‘lsa-da, Natalya teatr sahnasida chiqishlarini davom ettirdi: avvaliga yurib, keyinchalik esa aravachada sahnaga chiqardi. Aktrisa 2016-yilda hayotdan ko‘z yumdi. Afsuski, Krachkovskayaning o‘g‘li va nabirasi bilan iliq munosabatlari uning vafotidan bir necha yil oldin buzilgan edi.
Ota-bola Natalya go‘yoki jazmani haqida gapirgan intervyusini uyushtirgan jurnalistga ishonib, og‘ir kasal holatdagi aktrisadan shunchaki yuz o‘girishdi. Ammo Natalya o‘limiga yaqin singlisi Irina bilan uchrashishga muvaffaq bo‘ldi. Ular yigirma besh yildan beri ayro yashayotgan edi. Opa-singillar quvonchdan yig‘lab, kun bo‘yi bolaliklari haqida miriqib suhbatlashishgan.
Izoh (0)