Mashhur Bollivud yulduzi Amitabh Bachchanning o‘g‘li bo‘lishiga qaramay, o‘z yo‘lini mustaqil ravishda bosib o‘tib, kino sanoatida mustahkam o‘rnini egallagan Abhishek Bachchan joriy yil 5-fevral kuni 49 yoshga to‘ldi. Quyida Eastern Eye nashri reytingiga ko‘ra Osiyodagi eng hushbichim erkak unvoniga sazovor bo‘lgan, aktyorlik mahorati va xarizmasi bilan muxlislarini hayratda qoldirishda davom etayotgan Abhishek Bachchan hayot va ijod yo‘li haqida ma’lumot beramiz.
Bolalik
Abhishek Bachchanning haqiqiy familiyasi Shrivastav bo‘lib, u oilaviy an’analarga rioya qilgan holda Amitabh Bachchandan o‘rnak olib, Bachchan familiyasi bilan faoliyat yuritishga qaror qildi. Uning onasi Jaya Bachchan ham Hind kinosiga o‘z hissasini qo‘shgan san’atkorlardan bo‘lgan.
Yoshligida Abhishek dastlab iqtisodchi bo‘lishni istagan, ammo vaqt o‘tib san’atga qiziqishi ortgan. Bo‘lajak aktyor 1976-yil 5-fevralda Mumbay shahrida tavallud topgan. Uning Shveta ismli opa bor. Avval Bachchan ona shahridagi maktabga bordi, biroq boshlang‘ich ta’lim olish bola uchun qiyin kechdi, chunki Abhishek disleksiya kasalligidan aziyat chekar edi.
Disleksiya – bu o‘qish va yozish bilan bog‘liq nevrologik buzilish bo‘lib, odamning so‘zlarni to‘g‘ri tanib olish, ularni tushunish va talaffuz qilish qobiliyatiga ta’sir qiladi. Disleksiya bilan og‘rigan insonlar harflarni chalkashtirib qo‘yishi, so‘zlarni sekin va qiyinchilik bilan o‘qishi yoki yozishda xatolarga yo‘l qo‘yishi mumkin.
Shunga qaramay qat’iyat va mashaqqatli mehnat bilan yosh Abhishek ta’lim oldi. So‘ng o‘qishni Shveysariyada davom ettirdi. Bakalavr bosqichini u Boston universitetining iqtisod fakultetida tamomladi. Ammo Bachchan aktyorlikka ham katta qiziqish bildirgani uchun sohasini o‘zgartirishga qaror qildi.
Kino sanoatiga ilk qadam
Abhishek Bachchan 2000-yilda 24 yoshda debyut qildi. Uning “Qochoqlar” (Refugee) dramasidagi birinchi roli yosh aktyor uchun muvaffaqiyatli bo‘ldi. Uning kelishgan tashqi ko‘rinishi, (bo‘yi 188 sm, vazni 78 kilogrammdan oshmaydi), tabassumi va xush ovozi jamoatchilikda katta qiziqish uyg‘otdi.
Ammo uning ishtirokidagi keyingi loyihalar u qadar yuqori reytingga ega bo‘lmadi. Keyingi uch yil ichida Abhishekning filmografiyasida 17 ta film muvaffaqiyatsizlikka uchradi.
Ammo bular aktyorning Bollivudni zabt etish istagidan kechishga majbur qilmadi, aksincha, Abhishek Bachchan aktyorlik mahoratini oshirishga intildi va maqsadiga yetishdi ham.
2003-2004 yillarda “Ishq aqlimni ozdirar” filmi, keyin esa “Taqdirlar chorrahasi” loyihasidagi ikkita rol tomoshabinlar va tanqidchilar tomonidan yuqori baholandi. “Taqdirlar chorrahasi” dagi obrazi uchun Abhishek Hindiston kino instituti mukofotiga sazovor bo‘ldi.
2004 yilda Abhishek “Tezlik”da bosh rolni ijro etdi va film kassa daromadlari bo‘yicha Hindistonda yetakchi loyihalardan biriga aylandi. Aktyor o‘z muvaffaqiyatini “Banti va Babli” (2004) sarguzasht komediyasi bilan mustahkamladi. 2005-yilda esa otasi bilan birgalikda “Otam izidan” filmida ishtirok etdi. Loyiha ko‘plab muxlislar va kino tanqidchilarning olqishiga sazovor bo‘ldi va Hindiston kino instituti mukofoti bilan taqdirlandi.
2007-yilda Bachchan “Guru: Muvaffaqiyat sari yo‘l” filmida rol ijro etdi. 2008 yilda ota-bola Bachchanlar “Sarkar Raj” kriminal dramada yana bir bor hamkorlikda ishladi. Ushbu loyihada Abhishekning rafiqasi Ayshvariya Ray ham ishtirok etgan.
2010-yilda Abhishek va Ayshvarya yana bir loyihada birlashdi: ikki mashhur “Yovuzlik” filmida ishtirok etdi. Bachchan unda asosiy yovuz qahramon rolini o‘ynadi. 2011-yilda aktyor “Dum Maaro Dum” kriminal dramasida ishladi. Filmda Abhishek va Ayshvarya birgalikda ijro etgan qo‘shiq va unga ishlangan klip butun Hindistonda xit darajasiga ko‘tarildi.
Aktyor ishtirokidagi “Tezlik 3” (2013) jangari filmi Bollivudning eng qimmat loyihalaridan biriga aylandi. Shu bilan birga, u eng ko‘p daromad keltirgan hind filmlari ro‘yxatiga kirdi.
Shaxsiy hayot
Birgalikda turli loyihalarda ishtirok etgandan so‘ng Abhishek aktrisa Karishma Kapurni sevib qolgan va yoshlar hatto 2002-yilda unashtirishgan. Biroq 4 oydan keyin ularning munosabatlari uzilgan. Bunga Hindiston OAVlarida Bachchan oilasining yaqin do‘sti Amar Singxning aralashuvini sabab qilib ko‘rsatgan. Bundan tashqari, Karishmaga uning bo‘lajak turmush o‘rtog‘i to‘ydan keyin kinodagi faoliyatini tugatish shartini qo‘ygan, ammo u bunga rozi bo‘lishni istamagan.
1997-yilda Abhishek Bachchan Ayshvarya Ray bilan tanishib qolgan. Ammo ular oradan bir necha yil o‘tgach — faqat “Tezlik 2: Haqiqiy tuyg‘u” filmini suratga olish paytida yaqindan muloqot qilishni boshlagan. Ularning munosabatlari 2007-yil 14-fevral kuni dabdabali to‘y bilan yakunlandi.
Ma’lumotlarga qaraganda, to‘y marosimiga 900 ming dollardan ortiq mablag‘ sarflangan bu u o‘sha davrdagi Bollivud uchun eng qimmat to‘yga aylangan. Oradan to‘rt yil o‘tgach, 2011-yil noyabr ularning oilasida Aaradhiya ismli qizaloq dunyoga kelgan.
Er-xotin hozirda Hindistondagi kam ta’minlangan bolalar uchun xayriya ishlari bilan shug‘ullanadi. Ayshvariya Bachchanlar oila a’zolari bilan birgalikda Daulat Pur qishlog‘idagi kambag‘al oilalar qizlari uchun maktab qurdirgan.
Aktrisa Ayshvariya Ray Mumbayda bo‘lib o‘tgan milliarder Anant Ambani va Radhika Merchant nikoh to‘yiga faqat qizi Aaradhya bilan birga kelgani va u marosim davomida turmush o‘rtog‘ining qarindoshlaridan uzoqda yurgani ko‘plab mish-mishlarga sabab bo‘ldi.
Shu sababli Abhishek Bachchanning turmush o‘rtog‘i bilan ajrashishi haqida mish-mishlar tarqala boshladi.
Ammo yulduzli juftlik so‘nggi kunlarda tarqalgan mish-mishlarga javoban hech qanday izoh bermadi.
Abhishek Bachchan futbolning ashaddiy muxlisidir. Aktyor Hindiston terma jamoasi va “Chennayin” futbol klubi o‘yinlarini kuzatib boradi.
Abhishek Bachchan yaqinda “Sen bilan gaplashib olishim kerak” nomli filmda bosh rolni ijro etdi. Unda aktyor saraton kasalligidan omon qolgan Arjun Sen obrazini gavdalantirdi. Film 2025-yil 18-yanvarda Prime Video platformasida namoyish etildi.
Izoh (0)