Janubiy Koreyaning kino va drama sanoati nafaqat jozibali aktyorlari va kuchli syujetlari, balki inson irodasining haqiqiy sinovlari bilan ham mashhur. Ko‘plab yulduzlar ekran ortida shaxsiy muammolar va sog‘liq bilan bog‘liq qiyinchiliklarga duch kelishgan va og‘ir kasalliklarni yengishga muvaffaq bo‘lgan. Ular faqatgina sahnada emas, balki hayotning o‘zida bo‘lgan jangda ham g‘alaba qozongan haqiqiy qahramonlardir. Ushbu maqolada kasallikka bo‘ysunmagan, aksincha uni yengib, san’atga qaytgan koreys san’atkorlari haqida hikoya qilamiz.
Kim U Bin
U Bin faoliyatini model sifatida boshlagan va keyinchalik aktyorlikda o‘zini sinab ko‘rgan. U “Maktab 2013” serialidagi roli bilan mashhurlikka erishdi, keyinroq “Merosxo‘rlar” va “Telba oshiqlar” dramalari uning muvaffaqiyatini mustahkamladi. Kim U Bin yaqin kelajakda eng taniqli aktyorlardan biriga aylanishini bashorat qilishar edi, ammo uning taqdiri bir kunda o‘zgarib ketdi.
2017-yil 24-mayda aktyorga burun-halqum saratoni tashxisi qo‘yildi. Bu xabar tarqalishidan biroz avval U Bin “Telba oshiqlar” dramasida ishtirok etgan edi. U yerda aktyor qahramoni saraton kasalligi tufayli bor-yo‘g‘i uch oy yashashi kerak edi. Drama syujeti uning hayotiga ko‘chishi ko‘plab muxlislarni hayratda qoldirdi, ular aktyorning hayotda ham saratonga chalinganiga ishonishlari qiyin bo‘ldi.
Shifokorlar kasallikni to‘liq davolash uchun u vaqtida aniqlanganini xabar qildi va Kim U Bin darhol intensiv terapiyani boshladi. Aktyor uzoq vaqt davomida shou-biznesdan yiroqda bo‘ldi va natijada kasallikni yengishga muvaffaq bo‘ldi. Bir necha yillik davolanish va reabilitatsiyadan so‘ng u asta-sekin ishga qaytdi. Uning qaytishi 2020-yilda Blue Dragon Film mukofotini topshirish marosimidan boshlandi.
Kim Sanbom
Kim Sanbom “Guldan go‘zal bolalar” dramasidagi So I Chon roli tufayli shuhrat qozongan. 2018-yilda u degenerativ artritdan aziyat chekayotganini e’lon qildi, bu xabar uni yosh va baquvvat ko‘rishga odatlangan muxlislarni tashvishga soldi. Kim Sanbom bu kasallikka chalinishiga ikki sabab bor. Birinchidan, 2009-yilda sodir bo‘lgan avtohalokatda u jiddiy jarohatlar olgan. Ikkinchidan, “Padam-padam... yurak urishi” dramasidagi rol uchun aktyor 10 kg yo‘qotishga majbur bo‘lgan.
20 yoshidan beri degenerativ artrit bilan kasallangan Kim Sanbom davolanish va muntazam nazorat orqali kasallik bilan kurashishda davom etmoqda.
Pak So Dam
Park So Dam “Parazitlar” filmidagi roli bilan muvaffaqiyat qozondi. Mazkur film “Oskar”ni qo‘lga kiritgan birinchi xorijiy loyiha bo‘ldi.
Pak So Damga 2021-yilda qalqonsimon bezning papillyar saratoni tashxisi qo‘yildi. Saratonning bu turi keng tarqalgan va davolash mumkin bo‘lgan kasallik bo‘lsa-da, tashxis haqidagi xabar aktrisaning o‘zini ham, muxlislarini ham hayratda qoldirdi. So‘ng Pak So Dam barcha loyihalarini qoldirib, butun e’tiborini davolanishiga qaratdi. Unda saraton o‘simtasini olib tashlash operatsiyasi amalga oshirildi.
2023-yilda aktrisa “Fantom” filmida va “O‘lim o‘yini” dramasida ishtirok etib, kinoga qaytganini e’lon qildi.
Kim Su Hyon
Ko‘plab mukofotlarga sazovor bo‘lgan 36 yoshli aktyor Kim Su Hyon “Ko‘z yoshlar qirolichasi” (2024) seriali chiqishidan oldin ham mashhur va butun dunyoda tanilgan edi. Aktyorlik karyerasidagi uch yillik tanaffusdan oldin u bir nechta boshqa mashhur seriallarda, jumladan, “Orzular” (2011), “Oy quchog‘idagi quyosh” (2012), “Yulduzli odam” (2013), “Telba, lekin hammasi joyida” (2020) va “Oddiy bir kunda” filmlarida rol o‘ynagan.
Kim Su Hyon 13 yoshidan boshlab jiddiy yurak kasalligi — aritmiya va taxikardiyadan aziyat chekadi, bu xastalik uning hayot sifatini sezilarli darajada yomonlashtiradi. Ushbu muammolarni yengish uchun aktyor 20 yoshida yurak operatsiyasini o‘tkazdi. Hozirda u o‘z holatini kuzatishda davom etmoqda va yurak faoliyatini normal saqlash va kinodagi faoliyatini davom ettirish uchun kerakli dori-darmonlarni qabul qilib keladi.
Li Min Ho va Chon Il U
2006-yilda Li Min Ho do‘sti va hamkasbi Chon Il U bilan jiddiy avtohalokatga uchradi. Baxtsiz hodisada ularning ikkisi og‘ir tan jarohatlari oldi. Li Min Honing tos suyagi va tizzasi singan, shu sababli oyoqlariga metall sterjen o‘rnatilgan.
Yo‘l-transport hodisasi uning sog‘lig‘iga jiddiy ta’sir ko‘rsatdi, ammo aktyor tuzalib, aktyorlik karyerasiga qaytishga muvaffaq bo‘ldi. 2009-yilda u “Guldan go‘zal bolalar” dramasida bosh rolni o‘ynadi.
Chon Il U ham avariyada og‘ir jarohatlari oldi, jumladan, uning bilak va tos suyagi sindi, boshida ichki qon ketishi bo‘ldi. Uning tiklanishi uchun taxminan yetti oy vaqt kerak bo‘ldi. Biroq baxtsiz hodisaning eng jiddiy oqibati 2013-yilda yuzaga keldi: unga miya anevrizmasi tashxisi qo‘yildi. So‘ng aktyor depressiyaga ham tushib qoldi.
Barcha qiyinchiliklarga qaramay, Chon Il U ham kasalligini yengib, aktyorlikka qaytdi. U “Hechi”, “Zolushka va to‘rt ritsar” kabi mashhur dramalarda ishtirok etdi.
Izoh (0)