Tarixda o‘chmas iz qoldirgan sevimli sovet filmlarini qayta-qayta ko‘rganda ziyrak tomoshabinlar ilgari hech kim payqamagan turli xatoliklarni aniqlaydi. Bunday filmlardagi xatolarga har kimning munosabati har xil. Ba’zilar darhol rejissyorlarni e’tiborsizlikda ayblay boshlasa, boshqalar buni sevimli filmini qayta ko‘rish uchun yana bir sabab deb tushunadi.
“Ishdagi ishq” komediyasida modaga rioya qiluvchi, quvnoq xa hushchaqchaq kotiba Verochkani aktrisa Liya Axedjakova ijro etgan. Bundan avval u bir nechta filmlarda epizodik rollarda, shu jumladan Eldar Ryazanovning “Taqdir hazili yoki qushdek yengil bo‘ling” filmida ishtirok etgan. Hozir aktrisa 86 yoshda, lekin ko‘pchilik hali ham uning Verochka obrazida yodga oladi.
“Ishdagi ishq” syujetiga ko‘ra, Lyudmila Profokyevna Kalugina ofisdagi eng nazokatli va nozik didli ishchi — Verochkadan nafosat sirlarini o‘zlashtirishga qaror qiladi va o‘z kotibasiga maslahat so‘rab murojaat qiladi va uni xonasiga taklif qiladi.
Kalugina bilan suhbatda, Verochka ayollarga xos etika va noz-karashmalarni o‘rgatish chog‘ida qahramonning tirnoqlari yorqin qizil lak bilan qoplanganini ko‘rish mumkin.
So‘ng o‘sha vaqtda inventarizatsiya komissiyasi ofisga kirib keladi, natijada Kalugina va Verochka tinchroq joyga — majlislar zaliga ko‘chib o‘tadi. Keyingi kadrlarda esa Verochkaning tirnoqlaridagi qizil lakdan darak yo‘qligini ko‘rish mumkin.
Bunga o‘zingiz guvohi bo‘lishingiz uchun filmni 1 soat 12 daqiqasidan boshlab qayta tomosha qilish mumkin.
1977-yilda rejissyor Eldar Ryazanovning “Ishdagi ishq” tragikomediyasining premyerasi bo‘lib o‘tgan. Mazkur film 1978-yilda filmlar prokatida yetakchilik qildi, loyihani Sovet Ittifoqida 58 milliondan ortiq inson tomosha qilgan.
Film Eldar Ryazanovning Emil Braginskiy bilan birga teatr uchun yozgan “Hamkasblar” nomli qissasi asosida suratga olingan va 1979-yil RSFSR Davlat mukofoti bilan taqdirlangan. Syujetga ko‘ra, filmda Moskvadagi statistika qo‘mitasining turmushga chiqmagan rahbari Lyudmila Kalugina va uning qo‘l ostida ishlovchi iqtisodchi xodim Anatoliy Novoseltsevning nafrat bilan boshlangan munosabatlarining sevgiga aylanishi ko‘rsatib berilgan.
Izoh (0)