Ўзбекистон терма жамоаси эртага, 10 июнь куни Жаҳон чемпионати саралаши доирасидаги сўнгги тур учрашувини ўтказади. Темур Кападзе бошчилигидаги жамоа Тошкентдаги “Бунёдкор” стадионида Қатарга қарши майдонга тушади. Мазкур беллашув олдидан матбуот анжумани ташкил этилди.
Анжуманнинг иккинчи қисмида мезбон Ўзбекистон терма жамоаси бош мураббийи Темур Кападзе ва ҳужумчи Элдор Шомуродов журналистлар саволларига жавоб берди.
Темур Кападзе:
— Ассалому алайкум. Аввало барчани ғалаба билан табриклайман. Эртага бизни муҳим ўйин кутмоқда. Бу баҳсда зафар қучиб, халқимизни хурсанд қилмоқчимиз. Жамоанинг кайфияти яхши, ўйинга жиддий тайёргарлик кўряпмиз.
Афсуски, жамоада айрим йўқотишлар бор. Остон Ўрунов эртанги учрашувда иштирок этмайди. Отабек Шукуровда кичик жароҳат бор — у билан маслаҳатлашиб, майдонга тушиш-тушмаслиги борасида қарор қабул қиламиз.
БААга қарши ўйинда қандай бўлмасин ғалаба қозонишимиз керак эди. Дуранг натижа ҳам бизни қониқтирарди, шу боис ўйинда чиройли футбол кўрсата олмаганмиз. Айни пайтда ҳам ҳужумкор ўйин намойиш этмоқдамиз. Кейинги ўйинларда услубни ўзгартиришга ҳаракат қиламиз, эҳтимол, янги футболчиларни ҳам кашф этамиз.
Мен терма жамоада ўйнаган вақтларимда Қатарга қарши катта қийинчилик бўлмаган. Осиё Кубоги ва саралашнинг 3-босқичида ҳам яхши ўйин кўрсатганмиз, аммо бир оз омад етишмагани сабабли мағлуб бўлдик деб ўйлайман.
Сречко Катанец билан кўп бор учрашганман. У билан муносабатларимиз яхши. Жаҳон чемпионати йўлланмасида унинг ҳам ҳиссаси катта. Учрашганимизда уни ҳам мундиал йўлланмаси билан табрикладим.
Элдор Шомуродов:
— Ўзбекистон халқини ғалаба билан табриклайман. Стадионга келадиган мухлисларни чиройли ўйин билан қувонтиришга ҳаракат қиламиз. Жаҳон чемпионатига йўлланма олиш — катта ютуқ, бироқ ҳали байрам қилишга улгурмадик.
Эртага муҳим баҳс олдинда турибди. Мухлислар олдида майдонга тушамиз ва улар биздан ғалаба кутишади. Шунинг учун ғалаба қозониб, халқимизга қўшалоқ байрам улашишга интиламиз.
Эртага гол ургудек бўлсам, уни қандай нишонлашим ҳақида ҳали қарор қабул қилганим йўқ.
Эслатиб ўтамиз, Ўзбекистон — Қатар учрашуви 10 июнь, сешанба куни бўлиб ўтади. Ўйин соат 18:45 да бошланади.
Изоҳ (0)