АҚШ президенти Дональд Трамп яқин кунларда Украинадаги можарони ҳал этиш масаласида яхши янгиликлар кутилаётганини маълум қилди. Бу ҳақда у Қатар амири билан учрашувда маълум қилган.
“Менимча, бугун, эртага эҳтимол, жума куни Украина бўйича анча ижобий хабарлар олишимиз мумкин. Аммо кўрамиз”, деди Оқ уй раҳбари Доҳада Қатар амири билан учрашувда.
Шунингдек, у Қатарга АҚШнинг дипломатик саъй-ҳаракатларини, хусусан Украинадаги можарони ҳал қилиш масаласини қўллаб-қувватлагани учун миннатдорлик билдирган.
Бундан ташқари Трамп Россия президенти Владимир Путин билан Истанбулда учрашиш эҳтимолини инкор этмаган. Америка раҳбари, агар бу можаро якунини тезлаштирса ва “инсонлар ҳаётини сақлаб қолишга” ёрдам берса, Туркияга ташриф буюришини яна бир бор таъкидлаган.
Россия президенти Владимир Путин 15 май куни Истанбулда Украина билан тўғридан тўғри музокараларни бошлашни таклиф қилганди. Украина президенти Владимир Зеленский мазкур музокараларда Путинни шахсан кутишини айтди.
АҚШ президенти Дональд Трамп Россия ва Украина вакиллари ўртасида учрашувлар бўлиб ўтиши мумкин бўлган Истанбулга ташриф буюриш имкониятини кўриб чиқаётганини маълум қилди.
АҚШнинг Украинадаги махсус вакили Кит Келлог агар Россия президенти Владимир Путин 15 май куни Туркияга Россия ва Украина ўртасидаги учрашувга келса АҚШ президенти Дональд Трамп ҳам Истанбулга бориши мумкинлигини билдирди.
Россия президенти ёрдамчиси Юрий Ушаковнинг айтишича, Россия бош консуллиги ва Туркия ҳукумати эҳтимолий Россия—Украина музокаралари ўтказиладиган жойни ташкил этиш устида ишламоқда.
Изоҳ (0)