Исроил ҳарбийлари 21 май куни Ғарбий Соҳилга ташриф буюрган хорижий дипломатларга қарата ўт очди. Бу ҳақда CNN хабар берди.
Ҳодиса Женин қочқинлар лагери яқинида юз берган, европалик ва араб дипломатларининг катта делегациясига огоҳлантирувчи ўқ узилган.
20 дан ортиқ давлат, жумладан, Буюк Британия, Франция, Канада ва бошқа давлатлар делегациялари қамалдаги лагер атрофидаги гуманитар вазиятни кўриш учун расмий миссияда бўлган, деди Фаластин маъмурияти Ташқи ишлар вазирлиги.
Вазирлик ўт очишни “қасддан ва ноқонуний ҳаракат” деб баҳолаган. Воқеа акс этган видеодан Исроил аскарлари йўлни тўсиб турган дарвозадан узоқлашаётган делегацияга қарата ўқ узганини кўриш мумкин. Делегация аъзоларидан бири гуруҳни “деворга яқин туринглар” деб огоҳлантирган ва улар воқеа жойидан узоқлашган.
Вазирлик Исроил босқинчи ҳукуматига ушбу жинояткорона ҳужум учун тўлиқ ва бевосита жавобгарликни юклайди ҳамда бундай ҳаракатлар жазосиз қолмаслигини таъкидлайди, дейилади Фаластин ТИВ баёнотида.
Исроилнинг ҳодиса юзасидан муносабати
Исроил мудофаа кучлари гуруҳ дипломатик делегация экани маълум бўлгач, дастлабки тергов бошланганини маълум қилди.
Делегация тасдиқланган йўналишдан четга чиқиб, уларга жойлашиш тақиқланган ҳудудга кирди. Ушбу ҳудудда ҳаракат қилаётган аскарлар уларни узоқлаштириш учун огоҳлантирувчи ўқ узди, дейилади Исроил баёнотида.
Шунингдек, Исроил дастлабки тергов натижалари бўйича делегациялар билан боғланишини ва “етказилган ноқулайликлардан афсусда эканини” айтди.
БМТ ва Европа Иттифоқи буни қоралади
БМТнинг Ғарбий соҳилда ёрдам кўрсатишни ташкил этиш агентлиги директори Роланд Фридрих Исроил ҳарбийлари томонидан тақдим этилган воқеалар версиясини рад этди. У мазкур тушунтиришлар “воқеа жиддийлигини тўлиқ акс эттирмаслигини” маълум қилди.
Бу воқеа Исроил хавфсизлик кучлари томонидан Ғарбий соҳилда мунтазам равишда қўлланиладиган ва кўпинча ўлимга олиб келадиган ҳаддан ташқари куч ишлатиш ҳақида жиддий огоҳлантириш ҳисобланади. Бу ҳолат, уруш олиб бориш қоидалари қуролсиз фуқароларга нисбатан қандай қўлланилаётгани тўғрисида жиддий ташвиш уйғотади, деди Роланд Фридрих.
Европа дипломатияси раҳбари Кая Каллас ҳодисадан кейин “дипломатлар ҳаётига ҳар қандай таҳдидларни қабул қилиб бўлмаслигини” айтди.
Биз Исроилни ушбу ҳодисани тергов қилишга, шунингдек, айбдорларни жавобгарликка тортишга қатъий чақирамиз, деди у.
Италия, Испания, Франция, Канада ташқи ишлар вазирликлари Исроил элчиларини расмий тушунтириш бериш учун чақирди. Канада бош вазири Марк Карни эса содир бўлган воқеани тўлиқ ва зудлик билан тушунтирилишини кутаётганини айтди.
Бу мутлақо қабул қилиб бўлмайдиган ҳолат. Бу минтақада содир бўлаётган кўплаб мутлақо номақбул воқеаларнинг фақатгина бир қисми, холос, деди у.
Ирландия, Бельгия, Словения, Португалия, Германия, Нидерландия, Норвегия, Дания ва Буюк Британия вакиллари қатори Европанинг бошқа мамлакатларидан кўплаб расмий шахслар отишмани қаттиқ қоралади.
Бундан ташқари, Иордания, Миср, Туркия ва Қатар каби давлатларнинг ташқи ишлар вазирликлари ҳам ушбу ҳодисани кескин қоралаётганликларини билдирди.
Изоҳ (0)