Шимолий Корея—Ўзбекистон: миллий жамоа иккинчи ўринда қолиши учун ғалаба қозониши шарт бўлган баҳс ҳақида

Эртага, 19 ноябрь куни Лаос пояхти Вентян шаҳри “Лао” стадионида Шимолий Корея ва Ўзбекистон терма жамоалари тўқнаш келади. Жаҳон чемпионати саралашидан ўрин олган ушбу учрашув Ўзбекистон термасининг тўғридан тўғри мундиал йўлланмасини қўлга киритиш имкониятини сақлаб қолиши учун аҳамиятли ҳисобланади.

Мазкур ўйинда кувайтлик ҳакамлар бригадаси ишлайди. Бош ҳакам — Али Али Аҳмад, унга юртдошлари Аланези Абдулҳади ва Аббос Аҳмад ёрдам беради. Тўртинчи расмий ҳакам сифатида Аммар Ашканани ишлайди. ВАРда эса Абуллоҳ Жамали фаолият олиб боради.

Эртанги учрашувда Ўзбекистон жамоаси кўк, мезбонлар эса қизил либосда ўйнайди.

5 турдан сўнг Ўзбекистон миллий жамоаси 10 очко билан иккинчи ўринни эгаллаб турибди. Жамоа 3-босқичдаги уч учрашувда ғалаба қозонди. Эрон билан дуранг ўйнаган ўзбекистонликлар 14 ноябрь куни бўлиб ўтган Қатарга қарши учрашувда сўнгги дақиқалардаги урилган гол сабаб мағлубиятга учради.

Шимолий Корея жамоаси ҳужумкор ўйин кўрсатишига қарамай 5 учрашувда 2 очко тўплаб, А гуруҳида сўнгги ўринда бормоқда.

Ўзаро ўйинлар натижаси

Шимолий Корея ва Ўзбекистон миллий жамоаси 11 учрашувда тўқнаш келган. Учрашувларнинг 8 тасида Ўзбекистон жамоаси ғолиб чиққан бўлса, бир бора корейслар ғалаба қозонган. Икки учрашувда кучлар тенг келган.

Жамоалар илк бор 1998 йили Осиё Ўйинлари баҳсларида дуч келган. 7 декабрь куни бўлиб ўтган учрашувда ўзбекистонликлар йирик (4:0) ҳисобда ғалаба қозонган. Шимолий Корея жамоаси 2015 йили Жаҳон чемпионати саралаши учрашувида Ўзбекистон термаси устидан ғалаба қозонган. 4:2 ҳисобида якунланган учрашув корейсларнинг ягона муваффақияти ҳисобланади.

Тошкентда ўтказилган сўнгги учрашувда мезбонлар Жалолиддин Машариповнинг 20-дақиқада киритган ягона голи эвазига ғалаба қозонган эди.

Сўнгги 5 ўйин натижаси:

1. Шимолий Корея — Ўзбекистон 4:2, 16 июнь, 2015 йил;
2. Ўзбекистон — Шимолий Корея 3:1, 12 ноябрь, 2015 йил;
3. Ўзбекистон — Шимолий Корея 2:0, 13 октябрь, 2018 йил;
4. Ўзбекистон — Шимолий Корея 4:0, 7 июнь, 2019 йил;
5. Ўзбекистон — Шимолий Корея 1:0, 5 сентябрь, 2024 йил.

Терма жамоаларнинг сўнгги ўйин натижалари:

Ўзбекистон терма жамоаси сўнгги 5 ўйинда 3 бор ғалаба қозонди. Эрон жамоаси билан дуранг қайд этган жамоа, Қатарга мағлуб бўлди.

• Қатар — Ўзбекистон 3:2, 14 ноябрь, 2024 йил;
• Ўзбекистон — БАА 1:0, 15 октябрь, 2024 йил;
• Ўзбекистон — Эрон 0:0, 10 октябрь, 2024 йил;
• Қирғизистон — Ўзбекистон 2:3, 10 сентябрь, 2024 йил; 
• Ўзбекистон — КХДР 1:0, 5 сентябрь, 2024 йил.

Шимолий Корея жамоаси БАА ва Қатар жамоалари билан дуранг қайд этди. Жаҳон чемпионатидан ўрин олган қолган 3 ўйинда мағлуб бўлди. Корейслар худди Ўзбекистон сингари сўнгги тур учрашувида 3:2 ҳисобида мағлубиятга учради.

• КХДР — Эрон 2:3, 14 ноябрь, 2024 йил; 
• Қирғизистон — КХДР 1:0, 15 октябрь, 2024 йил; 
• БАА — КХДР 1:1, 10 октябрь, 2024 йил;
• КХДР — Қатар 2:2, 10 сентябрь, 2024 йил;
• Ўзбекистон — КХДР 1:0, 5 сентябрь, 2024 йил.

Йўқотишлар

Ўзбекистон терма жамоасида Остон Ўрунов Қатар ва Шимолий Кореяга баҳсларни ўтказиб юбориши аввалдан маълум бўлганди. Улар қаторига Элдор Шомуродов ва Отабек Шукуров ҳам қўшилди. Қатарга қарши учрашувнинг дастлабки дақиқаларида жароҳат олган Элдор ўрнини Жалолиддин Машариповга бўшатиб берганди.

Отабек Шукуров эса жароҳат билан учрашувнинг сўнгги дақиқаларига қадар ҳаракат қилди. Аммо шифокорлар унинг кейинги учрашувда майдонга туша олмаслигини қайд этди.

Шимолий Корея сафида Эронга қарши ўйинда жароҳат олган ҳужумчи Жо-гук Ри майдонга туша олмаслиги мумкин. Агар у ўйинда иштирок эта олмаса, Кум-сонг Жонг асосий таркибда унинг ўрнини эгаллаб, Ҳан Кванг-Сонг билан ҳужум чизиғида бирга ўйнаши кутилмоқда.

Энг қиммат оъйинчилар

Ўзбекистон таркибидаги Аббосбек Файзуллаев Россиянинг “ЦСКА” клубида тўп суради. Портал унинг трансфер қийматини 6 миллион еврога баҳолаган. “Ланс” клуби ҳимоячиси Абдуқодир Ҳусанов 5 миллионлик қийматга эга. Жамоа тўпурари ва “Рома” клуби футболчиси Элдор Шомуродов ҳам шунчага баҳоланган.

Шимолий Корея футболчилари асосан ички чемпионатда ўйнаши сабабли уларнинг бозор қийматини аниқлаш қийин. Тахминий ҳисоб китобларга қараганда, Кук-чол Жанг Шимолий Кореянинг кенгайтирилган таркибидаги энг қиммат футболчи бўлиб, унинг бозор қиймати 450 минг еврони ташкил этади.

FIFA рейтингидаги ўрни

Ўзбекистон терма жамоаси янгиланган FIFA рейтингида дунёда 58-ўринда қайд этилди. 1429 рейтинг очкосига эга ўзбекистонликлар Осиёда 7-ўринни эгаллаб турибди.

Шимолий Корея термаси жаҳонда 111-ўринда қайд этилган. 1175 очкога эга жамоа Тожикистон ва Қирғизистондан кейин жойлашиб, Осиёда 19-ўринда турибди.

Учрашув ҳақида

4-турдаги мағлубият сабаб Ўзбекистоннинг тўғридан тўғри мундиалга чиқиш имкони бир оз камайди. Сабаби Қатар ва БАА жамоалари ўртасидаги фарқ 3 очкога етди. 5-турда БАА ва Қатар жамоалари ўзаро тўқнаш келади. Бу эса ўзбекистонликларга иккинчи ўринда қолиш учун ғалабани нақд қилиш керак дегани. Тўғри, миллий жамоа дуранг билан ҳам 5-турдан сўнг иккинчи ўринда қолиши мумкин, аммо юқорида айтилганидек АҚШдаги мундиал учун йўлланма 4-босқичга қолиб кетиш хавфи ортади.

Сабаби, 2-даврада Ўзбекистон жамоаси БАА ва Эронга сафар уюштиради, Қирғизистон ва Қатарни уйида қабул қилади. БАА иккинчи ўрин учун ҳаракат қилаётган бўлса, Эрон Ўзбекистон устидан қозонилган ғалаба эвазига мундиал йўлланмасини эртароқ қўлга киритиш имкони пайдо бўлади.

Бундан ташқари, Эроннинг олдинга ўтиб кетиши ва мундиал йўлланмасига тур ўйинлари якунланмасдан эга чиқиши биз учун минусга ишлаши мумкин. Эсингизда бўлса, Россияда бўлиб ўтган 2018 йилги Жаҳон чемпионати сўнгги босқич сўнгги турида Ўзбекистон термаси Жанубий Кореяга қарши учрашувда дуранг қайд этиб, учинчи ўрин билан плей-офф йўлланмасига эга чиқиб, навбатдаги босқичга йўл олиши мумкин эди. Аммо Эрон жамоаси сўнгги дақиқаларда Суриядан тўп ўтказиб юборди ва Ўзбекистон 4-ўринни эгаллаб, гуруҳда қолиб кетди. Анзур Исмоиловнинг интервьюси эсингизда бўлса керак. Форслар бу сафар ҳам Ўзбекистон зарари учун “тасодифан” мағлуб бўлиб қолиши мумкин.

Шундай экан, жамоа учун КХДР ва Қирғизистонга қарши учрашувлардаги ғалаба сув ва ҳаводек зарур.

Шимолий Кореяда эса тўғридан тўғри йўлланмага эга чиқиш имконияти деярли йўқ. Аммо жамоа 3 ёки 4-ўринни эгаллаб, 4-босқич орқали мундиалга йўл олиш имконини сақлаб турибди. Шунинг учун жамоа Лаосдаги учрашувда бор имкониятини ишга солиши кутилмоқда.

Ўзбекистон терма жамоасида 3 асосий ўйинчининг йўқлиги ҳам корейслар фойдасига ишлаши мумкин.

Етакчиларнинг йўқлиги Катанесга ҳам синов, ҳам имконият бўлиши мумкин. Дейлик, Шукуровнинг йўқлиги ҳужум ортига Аббосбек Файзуллаевнинг тушишига имкон яратади. Турғунбоевнинг ўнгда, ҳужумда эса Бобурга имкон берилиши мумкин. Бу сафар Катанес Аббосни ўзи учун ноқулай ҳисобланган ўнг қанотга қўйишида мантиқ йўқ. Демак, биз Шимолий Кореяга қарши ҳужумкор таркиб кўришимиз мумкин. Ҳар ҳолда, ёрдамчи мураббий терма учун дуранг натижа қониқарли эканини айтмаса бўлди. 

Ғалаба жамоанинг очколари сонини 13 тага етказади ва терма Эронни қувиш ва ортдаги жамоалардан уч очко олдинда бўлиш имконини беради. Шундай экан, Катанес шогирдлари ушбу ўйин учун бор имкониятларидан фойдаланиши шарт ва зарур.