Футбол бўйича Жаҳон чемпионати 3-саралаш босқичи доирасидаги Эрон — Ўзбекистон баҳси олдидан Остон Ўрунов ва Шерзод Насруллаев жароҳатдан қутулиб, умумий машғулотларга қайтди. Бу ҳақда Ўзбекистон футбол ассоциацияси матбуот хизмати хабар берди.
Ўрунов Эрон чемпионати доирасидаги баҳсда жароҳат олган эди. У машғулотларга қайтган бўлса-да, Қирғизистонга қарши баҳс олдидан ўзини ноқулай ҳис қилгани учун мураббийлар штаби қайдномага киритмаган эди. Насруллаев эса Суперлига 1-тури доирасидаги “Сўғдиёна” билан ўйинда сафдан чиққан.
Шунингдек, 7-турни дисквалификация сабаб ўтказиб юборган Умарбек Эшмуродов ҳам таркибга қайтди. “Насаф” аъзоси 6-тур доирасидаги Шимолий Корея билан ўйинда қизил карточка олган ва шу боис қирғизистонликларга қарши баҳсни ўтказиб юборган эди.
Жалолиддин Машарипов сариқ карточкалари кўпайиб кетганлиги сабабли Эронга қарши баҳсни ўтказиб юборади. Футболчи саралаш доирасидаги Қатар ва Қирғизистон билан ўйинларда огоҳлантириш олган.
Маълумот учун, Эрон — Ўзбекистон ўртасидаги баҳс 25 март, сешанба куни Теҳрондаги “Озоди” стадионида бўлиб ўтади. Учрашув Тошкент вақти билан 21:00 да бошланади.
Изоҳ (0)