“Ўйиндан фақат ғалаба кутмоқдамиз ва бунга мажбурмиз. Бошқа натижа кутиш бизни Жаҳон чемпионатидан маҳрум қилиши мумкин. Худди аввалги саралашлардаги каби имкониятларимиз жуда юқори. Биз Қатардан барча нуқталарда кучлимиз ва буни майдонда кўрсатишимиз шарт”, дея фикр билдирди 33 ёшли футболчи.
Унинг фикрича, Ўзбекистон терма жамоаси Қатардан ҳар жиҳатдан кучли ва Осиё Кубогидан сўнг ўсишга эришди.
“Осиё Кубогидан сўнг орадан 8 ой ўтди. Терма жамоамиз бу вақт ичида ўсишга эришди. Буни инобатга олган ҳолда Қатарни таслим қилишимиз керак. Терма жамоамизда ҳамма нарса жойида.
Улар хорижлик ва маҳаллий футболчилар эвазига анча ўсди. Шунинг учун Осиё Кубогида бизга қийин бўлганди. Очиғини айтганда ўша турнирда ёмон кўрсатмагандик, ўйин томонлама энг яхшиси эдик. Пенальтилар сериясига тайёрланмаганимиз панд берганди”, дейди ҳужумчи.
“Навбаҳор” клуби футболчиси қатарлик ҳужумчилар ва Ўзбекистон термаси футболчиларига тўхталди.
“Акрам Афиф ҳозир яхши формада. Лекин уни тўхтатиш бизнинг ҳимоячиларга қийин эмас. Ҳусанов, Алиқулов уни зарарсизлантиришга 50 фоиз кучини сарфласа кифоя. Ҳужумдаги футболчиларимизга кўпроқ узоқдан зарбалар беришини таъкидлаган бўлардим. Қатар дарвозабонлари узоқдан зарбаларда кўп хатоларга йўл қўйишади. Буни ички чемпионатда ҳам кўриш мумкин” дейди Сардор Рашидов.
Маълумот учун, Рашидов Ўзбекистон терма жамоаси сафида 48 ўйинда қатнашиб, 12 бор рақиблар дарвозасига йўл топган. 2015 йил Саудия Арабистонига қарши учрашувда ҳужумчи 2 бор рақиблар дарвозасини ишғол қилган.
Бундан ташқари, Сардор уч бора Ўзбекистон чемпионати, шунча бор Ўзбекистон кубоги ва бир марта Ўзбекистон Суперкубогида ғалаба қозонган.
Изоҳ (0)