Эртага, 14 ноябрь куни Доҳада жойлашган Жассим Бин Ҳамад стадионида Қатар ва Ўзбекистон терма жамоалари тўқнаш келади. Жаҳон чемпионати саралашидан ўрин олган учрашув икки жамоа учун ҳам аҳамиятли ҳисобланади.
Учрашувда кореялик ҳакамлар бригадаси фаолият олиб боради. Бош ҳакам сифатида Ким Жонгҳёк ишласа, унга қанотларда юртдошлари Парк Кюнёнг ва Жанг Жонгпил ёрдам беради. Тўртинчи расмий ҳакам сифатида Чаэ Сангҳёп ишлайди. ВАР ҳаками бўлиб Ким Ҳегон фаолият олиб боради.
Эртанги баҳсда мезбонлар қизил либосда, Ўзбекистон жамоаси оқ либосларда майдонга тушади.
4 турдан сўнг Ўзбекистон жамоаси 10 очко билан А гуруҳида Эрон билан биргаликда етакчилик қилмоқда. Жамоа учрашувларнинг 3 тасида ғалаба қозонди ва форсларга қарши учрашувда дуранг қайд этди.
Қатар жамоаси эса ўйинларнинг фақат биттасида ғалаба қозонди ва бир учрашувда дуранг қайд этди. 2 баҳсда мағлубиятга учраган араблар 4 очко билан турнир жадвалида 4-ўринда бормоқда.
Ўзаро ўйинлар натижаси
Ўзбекистон ҳамда Қатар жамоалари 15 бор расмий учрашувларда қатнашган. Учрашувларнинг 9 тасида ўзбекистонликлар ғалаба қозонган, 4 учрашувда қатарликларнинг қўли баланд келган. Баҳсларнинг 2 тасида дуранг қайд этилган.
Ўзбекистон терма жамоаси Қатарни 2 бор 4 тўп фарқи билан ғалаба қозонган. 2009 йили бўлиб ўтган учрашув 4:0 ҳисобида якунланди. 2013 йил Жаҳон чемпионати саралашидан ўрин олган учрашувда ўзбекистонликлар 5:1 ҳисобида ғалаба қозонди.
2014 йил Қатар жамоаси ўртоқлик учрашувида Ўзбекистон миллий жамоасини 3:0 ҳисобида мағлубиятга учратган. Бу ҳисоб арабларнинг ўзбекистонликлар устидан қозонган энг йирик ғалабаси ҳисобланади.
Терма жамоаларнинг сўнгги учрашуви Осиё Кубоги доирасида юз берган эди. Учрашувнинг асосий вақтида дуранг қайд этилган ўйинда Ўзбекистон жамоаси пенальтилар сериясида 2:3 ҳисобида мағлуб бўлганди.
Жамоа айнан шу мағлубият қасосини олишга уриниб кўради.
Ўзаро ўйин натижалари
- Осиё Кубоги. 2024 йил, 3 февраль Қатар—Ўзбекистон 1:1;
- FIFA халқаро ўртоқлик ўйини. 2018 йил, 16 октябрь Ўзбекистон—Қатар 2:0;
- Жаҳон Чемпионати саралаши. 2017 йил, 28 март Ўзбекистон—Қатар 1:0;
- Жаҳон Чемпионати саралаши. 2016 йил, 6 сентябрь Қатар—Ўзбекистон 0:1;
- FIFA халқаро ўртоқлик ўйини. 2014 йил, 6 октябрь Қатар—Ўзбекистон 3:0.
Сўнгги ўйин натижалари
Ўзбекистон миллий жамоаси сўнгги 5 ўйиннинг учтасида ғалаба қозонди ва 2 бор дуранг қайд этди. Ушбу учрашувларнинг 2 тасида Ўзбекистон жамоаси Эронни енга олмади.
- Ўзбекистон—БАА 1:0, (2024 йил, 15 октябрь);
- Ўзбекистон—Эрон 0:0, (2024 йил, 10 октябрь);
- Қирғизистон—Ўзбекистон 3:2, (2024 йил, 10 сентябрь);
- Ўзбекистон—КХДР 1:0, (2024 йил, 5 сентябрь);
- Эрон—Ўзбекистон 0:0, (2024 йил, 11 июнь).
Қатар жамоаси сўнгги 5 ўйиннинг 2 тасида ғалаба қозонди. Шимолий Корея билан дуранг қайд этган қатарликлар БАА ва Эрон жамоаларига мағлубиятга учради.
- Эрон—Қатар 4:1, (2024 йил, 15 октябрь);
- Қатар—Қирғизистон 3:1, (2024 йил, 10 октябрь);
- КХДР—Қатар 2:2, (2024 йил, 10 сентябрь);
- Қатар—БАА 1:3, (2024 йил, 5 сентябрь);
- Қатар—Ҳиндистон 2:1, (2024 йил, 11 июнь).
Йўқотишлар
Ўзбекистон терма жамоасининг тажрибали ҳужумчиларидан бири Остон Ўрунов учрашувда қатнаша олмайди. Унинг ўрнига “Нефтчи” клуби футболчиси Азизбек Амонов жалб этилган. Қолган барча футболчилар баҳсга тайёр. Жалолиддин Машарипов бир оз шамоллаб қолгани ҳақида маълум қилганди. Аммо катта эҳтимол билан жамоа етакчиларидан бўлган футболчи майдонга тушади.
Қатар жамоаси идеал таркиб билан ўйинга тайёр. Ўзбекистонга қарши учрашувда турли сабаблар билан майдонга туша олмайдиган футболчилар ҳақида маълумотлар йўқ.
Энг қиммат оъйинчилар
Терма жамоанинг чап қанот ҳужумчиси Акрам Афиф қатарликлар сафида энг қиммат ўйинчи ҳисобланади. У Transfermarkt томонидан 6 миллион еврога баҳоланган. Жамоа ҳужумчиларидан яна бири Алмоэз Али 3 миллион евролик нарх билан жамоада иккинчи футболчи сифатида эътироф этилган. Келиб чиқиши бразилиялик бўлган Эдмилсон 2 миллион евро қийматга эга.
-sc6SVpxG.png)
Ўзбекистон таркибидаги Аббосбек Файзуллаев Россиянинг “ЦСКА” клубида тўп суради. Портал унинг трансфер қийматини 6 миллион еврога баҳолаган. “Ланс” клуби ҳимоячиси Абдуқодир Ҳусанов 5 миллионлик қийматга эга. Жамоа тўпурари ва “Рома” клуби футболчиси Элдор Шомуродов ҳам шунчага баҳоланган.
Учрашув ҳақида
Ушбу ўйин ҳар икки жамоа учун ўта муҳим. Меҳмонлар 3 очко эвазига қатарликлар билан орадаги фарқни 9 очкога етказади ва Жаҳон чемпионати йўлланмаси учун катта қадам ташлайди. Қолаверса, мағлубиятсиз серия қайд этиб келаётган Сречко Катанес шогирдлари Осиё Кубогидаги мағлубият учун ўч олиб, мухлисларни хурсанд қилишга чоғланган.
Қатарликлар эса ушбу ўйиндаги мағлубият уларни йўлланмадан анча узоқлаштиришини яхши тушуниб турибди. Учрашувдаги ғалаба жамоага Ўзбекистон билан фарқни уч очкогача қисқартириш имконини беради.
Ўзбекистон терма жамоаси ҳужумчиси Элдор Шомуродов ушбу ўйинда ҳужумкорликка эътибор бериш билан бир қаторда гол ўтказиб юбормаслик кераклигини таъкидлаган.
Ҳозирда жамоа сардори етарли ўйин амалиётига эга эмас, аммо унинг ортида ҳаракатланаётган Аббосбек Файзуллаев ажойиб формада. Бундан ташқари ҳимояда тўп сураётган Абдуқодир Ҳусанов ишончли ўйини сабаб топ жамоалар нигоҳида. Шундай экан жамоа ҳимояни мустаҳкам сақлаган ҳолда ҳужумдаги имкониятлардан фойдаланиб ғалаба қозонишига ишониш мумкин.
Ўзбекистон терма жамоаси Қатар ва Шимолий Корея билан баҳсларни сафарда ўтказади. Ушбу икки ўйиндаги ғалаба терма жамоанинг мундиалга чиқиш имкониятларини 90 фоизга етказади.
2025 йилни ўзбекистонликлар ўз майдонида қўшни Қирғизистонга қарши учрашув билан бошлайди. Катанес шогирдлари назарий жиҳатдан имкониятлари ўзлари билан тенг жамоаларга қарши навбатдаги 3 баҳсда 9 очко олишни уддаласа, 2026 йилги Жаҳон чемпионатига “бир оёғи билан” йўл олишга улгуради. Бунда Эрон ҳам ишончли ўйнаши ва рақибларини мағлуб этиши зарур.
Маълумот учун, Қатар — Ўзбекистон учрашуви 14 ноябрь Тошкент вақти билан 21:15 да Жассим бин Ҳамад стадионида старт олади.
Изоҳ (0)