Осиёда 2026 йилди Жаҳон чемпионати саралаш доирасидаги 7-тур учрашувлари якунланди. Ўзбекистон 20 март, пайшанба куни Тошкентда Қирғизистонга қарши майдонга тушиб, 1:0 ҳисобида ғалаба қозонди. Беллашувлардан кейин Wе Глобал Football портали миллий жамоаларнинг Америка қитъасида бўладиган мундиалга йўлланма олиш имкониятларини баҳолади.
Унга кўра, Ўзбекистон миллий жамоасининг А гуруҳидан океан ортидаги Жаҳон чемпионатига тўғридан-тўғри йўлланма олиш имконияти 92,6 фоизга баҳоланмоқда. Ҳозирда Темур Кападзе бошчилигидаги жамоа Япония, Эрон ва Жанубий Кореядан кейин ЖЧга борадиган 4-жамоа сифатида кўрсатилмоқда.
А гуруҳида Эроннинг имкониятлари энг юқори баҳоланган. 7-турдан кейин форсларнинг мундиалга бориш эҳтимоли 100 фоизга етди. Ўзбекистон эса 2-поғонани эгаллаб, тарихда илк марта дунёдаги энг нуфузли мусобақада қатнашиши тахмин қилинган. Бирлашган Араб Амирлиги 7-турда Эрондан учралган мағлубиятдан кейин ЖЧ йўлланмасига эга чиқиши 6 фоиз деб ҳисобланган. Қатарда эса ушбу кўрсаткич 1,3 фоиз деб тахмин қилинган. Гуруҳ аутсайдерлари Қирғизистон ва Шимолий Кореяда 2026 йилги ЖЧга бориш эҳтимоли 0 фоиз.
АҚШ, Мексика ва Канада майдонларида ўтадиган мусобақа учун Осиё қитъасига 8,5 та квота ажратилган. 3 та гуруҳдаги 1 ва 2-ўринларни эгаллаган жамоалар тўғридан-тўғри йўлланма олса, гуруҳлардаги 3—4-ўриндаги жамоалар плей-оффлар орқали қолган 2,5 та йўлланма учун кураш олиб боради.
Ўзбекистон терма жамоаси 7-турдан кейин 16 очко билан А гуруҳида 2-ўринни эгаллаб турибди. Пешқадам Эрон 19 очкон қўлга киритган. БАА ва Қатар 10 очко билан 3 ва 4-ўринлардан жой олган. Қирғизистон (3 очко) ва Шимолий Корея (2 очко) сўнгги поғоналарни банд этган.
Миллий жамоа кейинги учрашувни 25 март куни сафарда Эронга қарши ўтказади. Беллашув Тошкент вақти билан 21:00 да бошланади.
Изоҳ (0)