Украина президенти Владимир Зеленский ҳукуматга 22 ёшгача бўлган украиналиклар учун давлат чегарасидан ўтишни соддалаштириш бўйича топшириқ берди. Бу ҳақда РБК Украина нашри хабар берди.
Манбага кўра, Владимир Зеленский бу ҳақда “Украина ёшлар форуми — 2025” тадбирида маълум қилган.
“Ҳозирги вақтда 18 ёшгача бўлганлар учун имтиёзлар мавжуд. Мен бу чегарани 22 ёшгача оширишни таклиф қиламан, шунда (чегарадан ўтишда — таҳр.) ҳеч қандай чеклов бўлмайди”, — деган президент.
Зеленскийнинг таъкидлашича, бу ташаббус кўплаб украиналикларга Украина билан алоқаларни сақлаб қолиш ва мамлакатда таълим олиш имконини беради.
Қайд этилишича, уруш шароитида 18 ёшдан 60 ёшгача бўлган эркакларга Украинани сабабсиз тарк этиш тақиқланган. Ҳарбий сафарбарлик даврида эса айрим украиналикларга чет давлатларга чиқиш ҳуқуқи берилади. Бироқ бу барча фуқароларга тааллуқли эмас.
Хусусан, чет элга чиқиш ҳуқуқига қуйидагилар эга:
- ногиронлиги бўлган эркаклар;
- биринчи ёки иккинчи гуруҳ ногирон ота-онасига ҳамроҳ бўлаётганлар;
- уч нафар вояга етмаган фарзанди бор эркаклар;
- вояга етмаган ногирон фарзанди бор ота-оналар;
- бошқа айрим тоифалар.
Ҳар бир ҳолат бўйича чиқиш шартлари фарқ қилади ва шунга қараб ҳужжатлар жамламаси тайёрланади.
Шунингдек, Украина олий таълим муассасаларида таҳсил олаётган талабалар ҳам академик мобиллик дастурлари бўйича бир семестрга чет элга чиқиши мумкин. Аммо бу имконият ҳам барча талабалар учун эмас. Бунинг учун танловдан ўтиш лозим бўлади.
Изоҳ (0)