Жаҳон чемпионати йўлланмаси 99 фоизга ҳал бўлиши мумкин. Ўзбекистон Эронга қарши “Озоди”да ўйнайди (превю)

Осиёда 2026 йилги Жаҳон чемпионати саралаш босқичи ўзининг қизғин палласига кириб келди.  Ўзбекистон миллий терма жамоаси 25 март куни 8-тур доирасидаги навбатдаги баҳсда Эронга қарши майдонга тушади.

Ушбу ўйин олдидан ҳар икки терма жамоанинг ҳозирги ҳолати, ЖЧга чиқиш имкониятлари ва таркибидаги энг қиммат футболчилари ҳақида батафсил тўхталамиз.

Ҳозиргача қайд этилган натижалар ва турнир жадвали

Ўзбекистон терма жамоаси

Ўзбекистон терма жамоаси Мундиал саралашидаги дастлабки ўйинни Тошкентда Шимолий Кореяга қарши ўтказиб, кичик 1:0 ҳисобида ғалаба қозонган. 2-турда эса Бишкекка сафар уюштириб, Қирғизистондан 3:2 ҳисобида устун келган. 3-турда жамоанинг азалий рақибларидан бири Эрон билан “Бунёдкор”да ўйин ўтказилди. Учрашувда ҳисоб очилмади — 0:0. Кейинги баҳс ҳам Тошкентда бўлиб ўтди. Бу сафар жамоа Бирлашган Араб Амирлигини қабул қилди ва Отабек Шукуровнинг пенальтидан киритган голи эвазига 3 очкони қўлга киритилди. 5-турда Ўзбекистон Доҳада Қатар билан ўйин ўтказди. Биринчи таймда “оқ бўрилар” кетма-кет иккита гол ўтказиб юборди. Ўйиннинг иккинчи бўлимида жамоа қайта олди ва Аббосбек Файзуллаевнинг дубли эвазига ҳисоб тенглашди, бироқ учрашув якуни арафасида Қатар яна битта гол уриб, ғалабани ўз томонига оғдирди. Ўзбекистон 6-турда КХДР билан ўйин ўтказди. Кореядаги сиёсий вазиятлар туфайли учрашув Лаосда бўлиб ўтди. Қийин кечган баҳсда жамоа 1:0 ҳисобида ғалаба қозонди.

22 январь куни терма жамоа устози Сречко Катанец соғлиғидаги муаммолар сабаб МТЖ постидан кетишга мажбур бўлди ва унинг ўрнига Темур Кападзе тайинланди. 20 март куни жамоа унинг қўл остидаги расмий дебютини Қирғизистонга қарши ўтказиб, 1:0 ҳисобидаги қийин ғалабани қўлга киритди.

Эрон терма жамоаси

А гуруҳидаги ягона мағлуб бўлмаган жамоа — Эрон. Форслар дастлабки турни Теҳронда Қирғизистонга қарши ўтказиб, 1:0 ҳисобида ғалаба қозонди. Кейин эса Ал-Айнда БААга қарши майдонга тушиб, 3 очко билан ортга қайтди — 1:0. 3-турда Амир Галенои бошчилигидаги жамоа Тошкентда Ўзбекистон билан дуранг ўйнади. Кейин эса Қатар йирик ҳисобда таслим этилди (4:1). Улар 5-турда Шимолий Кореяни (3:2), 6-турда Қирғизистонни (3:2), 7-турда БААни (2:0) ҳам мағлуб этишни уддалади.

Турнир жадвалидаги ҳолатга назар соламиз. 7-турдан кейин А гуруҳида Эрон етакчилик қилмоқда. Ҳозирда форслар 19 очко билан ЖЧ йўлланмасини 99 фоизга ҳал қилган. 8-турда бўладиган Ўзбекистонга қарши баҳсдаги дуранг ҳам Эронни Америка қитъасида бўладиган Мунидалга олиб чиқади. Ўзбекистон 16 очко билан 2-ўринни эгаллаб турибди. Жамоа ортда қолган 7 турда 5 ғалаба, 1 дуранг ва 1 мағлубият қайд этган. 10 очко тўплаган БАА ва Қатар мос равишда 3—4-ўринлардан жой олган. Қирғиз Республикаси (3 очко) ҳамда Шимолий Корея (2 очко) аутсайдер сифатида охирги ўринларда кетмоқда.

А гуруҳи турнир жадвали

1. Эрон — 19 очко
2. Ўзбекистон — 16 очко
3. БАА — 10 очко
4. Қатар — 10 очко
5. Қирғизистон — 3 очко
6. Шимолий Корея — 2 очко

Саралаш босқичи тўпурарлари

Ўзбекистон терма жамоаси ортда қолган 7 турда 9 та гол уришни уддалаган. Аббосбек Файзуллаев 3 марта рақиб дарвозасини ишғол қилиб, “оқ бўрилар” тўпурари бўлиб турибди.

Қолган 6 гол эса 6 нафар футболчи томонидан киритилган. Элдор Шомуродов, Жалолиддин Машарипов, Ҳусниддин Алиқулов, Остон Ўрунов, Ҳожиакбар Алижонов ва Отабек Шукуров каби футболчилар ўз ҳисобига биттадан гол киритишни уддалаган.

Эрон 14 марта рақиб дарвозабонини ранжитган. Форслар ўтган 7 турда фақат Ўзбекистон терма жамоаси дарвозасига гол кирита олмади, қолган 6 баҳснинг барчасида тўп киритган. Сардор Азмун ва Муҳаммад Моҳеби 4 тадан гол уриб, Эрон терма жамоаси тўпурарлари бўлиб турибди. Шунингдек, Меҳди Тареми ва Меҳди Гаеди 2 мартадан рақиб дарвозасини ишғол қилган. Салеҳ Ҳардани битта гол урган бўлса, битта гол автогол эвазига киритилган.

Ўзаро учрашувлар тарихи

Ўзбекистон ва Эрон 15 марта тўқнаш келишган. Форслар ўтказилган баҳсларнинг 10 мартасида ғалаба қозонишни уддалаган бўлса, 1 марта имкониятни бой берган. 4 та учрашув эса дуранг билан якунланган.

Ушбу жамоалар ўртасидаги илк баҳс 1998 йилда ўтказилган бўлиб, унда Эрон йирик 4:0 ҳисобида ғалаба қозонган. Охирги учрашув эса 2024 йилда бўлиб ўтган. “Бунёдкор” стадионида кечган баҳс 0:0 ҳисобида якунланган.

Ўзбекистон ягона ғалабасини 2012 йил 2014 йилги Жаҳон чемпионати саралаш доирасидаги баҳсда қўлга киритган. Теҳронда кечган баҳс тақдирини битта гол ҳал қилган. 71-дақиқада Улуғбек Бақоев томонидан киритилган тўп якунда “оқ бўрилар”га ғалаба тақдим этган.

Ўзаро ўйинлардаги тўплар нисбати ҳам Эрон томонда. Форслар 18 марта ўзбекистонликлар дарвозасини ишғол қилган бўлса, 5 маротаба дарвозасидан тўп олиб чиққан.

Энг қиммат футболчилар

Ўзбекистон Осиё қитъасида энг қиммат 3-жамоа ҳисобланади. Ҳозирда Темур Кападзе бошчилигидаги “оқ бўрилар”нинг умумий қиймати 70 миллион еврони ташкил қилади.

Таркибдаги энг қиммат футболчи “Манчестер Сити” аъзоси Абдуқодир Ҳусанов ҳисобланади. Ҳимоячи Transfermarkt томонидан 35 миллион еврога баҳоланмоқда. Кейинги ўринлардан Аббосбек Файзуллаев (8 миллион евро) ва Элдор Шомуродов жой олган (4 миллион евро).

Ўзбекистоннинг энг қиммат 10 нафар футболчиси:

1. Абдуқодир Ҳусанов — 35 миллион евро;
2. Аббосбек Файзуллаев — 8 миллион евро;
3. Элдор Шомуродов — 4 миллион евро;
4. Остон Ўрунов — 2,5 миллион евро;
5. Отабек Шукуров — 1,8 миллион евро;
6. Жалолиддин Машарипов — 1,8 миллион евро;
7. Ҳусниддин Алиқулов — 1,7 миллион евро;
8. Абдувоҳид Неъматов — 1,5 миллион евро;
9. Акмал Мозговой — 1,3 миллион евро;
10. Шерзод Насруллаев — 1,3 миллион евро.

Эрон терма жамоаси трансфермаркт томонидан 46,30 миллион еврога баҳоланган. Форслар таркибида ҳаракат қиладиган энг қиммат футболчи “Интер” ҳужумчиси Меҳди Тареми ҳисобланади — 8 миллион евро. Кейинги ўринда эса БААнинг “Аш-Шабаб” клуби сафида ҳаракат қиладиган Сардор Азмун қайд этилган, унинг қиймати 7,5 миллион евро деб белгиланган. Меҳди Гаеди эса 4 миллион евро билан кучли учликка якун ясаган.

Эроннинг энг қиммат 10 нафар футболчиси:

1. Меҳди Тареми — 8 миллион евро
2. Сардор Азмун — 7,5 миллион евро
3. . Меҳди Гаеди — 4 миллион евро
4. Муҳаммад Моҳеби — 3,5 миллион евро
5. Алиризо Жаҳонбаҳш — 2,3 миллион евро
6. Ҳусайн Канони — 2 миллион евро
7. Саман Ғоддос — 1,8 миллион евро
8. Али Ғолизода — 1,5 миллион евро
9. Муҳаммад Амин — 1,2 миллион евро
10. Милад Муҳаммади — 1,2 миллион евро

Мураббийлар фикри:

Темур Кападзе Эронга қарши баҳс олдидан матбуот анжуманида қатнашди.

Бизни қизиқарли ўйин кутиб турибди. Эрон қандай кучга эгалигини биламиз. Ўзбекистон терма жамоаси ҳам нималарга қодирлигини ҳамма хабардор. Иккита кучли  жамоа ЖЧ йўлланмаси учун кураш олиб боради. Ўйинга яхши тайёргарлик кўрдик.

Охирги йилларда бир неча бор тўқнаш келганимиз учун Эрон терма жамоасини яхши биламиз. Ўзимизда етрлича маълумот бор ҳамда ва Эрон Про Лигасида ўйнайдиган футболчилардан ҳам маълумотлар олдик.

Машарипов жамоамизнинг муҳим футболчиси ҳисобланади. Футболда дисквалификациялар учраб туради. Остон билан ҳаммаси жойида. Кичик жароҳати бўлса-да, усҳрашувга тайёргарлик кўрмоқда. Қолган ҳеч қайси футболчининг соғлиғи билан муаммо йўқ.

Амир Галенои Ўзбекистонга қарши баҳс олдидан матбуот анжуманида қатнашди.

Ўзбекистон терма жамоаси таркибида ажойиб футболчилар бор, улардан уч нафари Эрон чемпионатида тўп тепади. Биз оғир ўйин кутаётганини биламиз. Ўзбекистон 3-4-3 тактикасида ўйнайди. Улар ушбу схема билан ўйнаб натижага эришиб келмоқда. Биз ҳам шу тактика устида ишладик. Эҳтимол, эртага биз ҳам 3-4-3 тактикасида ҳаракат қилишимиз мумкин.

Ўзбекистонга қарши баҳсдан кейин яна икки муҳим финал бор. Миллий жамоада ҳар бир ўйин финалга тенг, чунки у тарихга муҳрланади. Шимолий Кореяга қарши биринчи ўйинда жуда қийналган эдик, шу боис ҳисоб-китоб қиладиган нарсалар бор.

БААни мағлуб этганимиздан кейин мен барча футболчиларимга Ўзбекистон ҳақида ўйлашимиз кераклигини айтдим. Улар ҳам яхши мотивацияга эга ва яхши натижага эришишни истамоқда. Лекин натижа Аллоҳнинг қўлида.

Учрашув ҳақида:

Эрон — Ўзбекистон терма жамоалари ўртасидаги баҳс 25 март, сешанба куни бўлиб ўтади. Учрашув Теҳрондаги “Озоди” стадионида Тошкент вақти билан 21:00 да бошланади.