АҚШ президенти Дональд Трамп 15 май куни Бирлашган Араб Амирликларига ташрифида умумий қиймати 200 миллиард доллардан ортиқ бўлган келишувларни эълон қилди. Икки давлат сунъий интеллект соҳасидаги ҳамкорликни чуқурлаштиришга ҳам келишиб олди. Бу ҳақда Reuters хабар берди.
Трамп БАА авиакомпаниясининг 28 та Boeing самолётига 14,5 миллиард доллар сармоя киритиш мажбуриятини ўз ичига олган битимларни эълон қилди. Икки давлат “АҚШ—БАА сунъий интеллектни ривожлантириш ҳамкорлиги” дастурини ишлаб чиқишга келишиб олди.
Манбаларга кўра, бу келишувлар Форс кўрфази мамлакатига АҚШнинг илғор сунъий интеллект чипларидан кенг фойдаланиш имконини беради. Илгари Вашингтон Хитойнинг ушбу технологиядан фойдаланиши мумкинлиги ҳақида хавотирланиб, чекловлар ўрнатган эди.
Муносабатларимиз фақат кенгайиб ва мустаҳкамланиб боришига мутлақо шубҳам йўқ. Сизнинг ҳурматли укангиз бир неча ҳафта олдин Вашингтонга ташриф буюрди ва бизга 1,4 триллион доллар миқдоридаги саховатли таклифингиз ҳақида маълумот берди, деди Трамп БАА президенти билан учрашувда.
Амирликлар 10 йил давомида АҚШга 1,4 триллион доллар сармоя киритишни мақсад қилган. Йирик нефть ишлаб чиқарувчи бўлган БАА глобал сунъий интеллект ўйинчисига айланиш учун миллиардлаб доллар сарфламоқда. Ташриф давомида Трампга БААнинг энг олий “Заед” ордени топширилган.
Маълумот ўрнида, АҚШ раҳбари Яқин Шарққа расмий ташрифи давомида Қатар билан 1,2 триллион долларлик иқтисодий битим имзолади, Саудия Арабистони эса АҚШга 600 миллиард доллар сармоя киритиш мажбуриятини олди.
Изоҳ (0)