Жаҳон чемпионати саралаш босқичи 8-тури доирасидаги Эрон — Ўзбекистон баҳси 25 март, сешанба куни бўлиб ўтди. Учрашув 2:2 ҳисобидаги дуранг натижа билан якунланди. Ўзбекистон терма жамоаси устози Темур Кападзе ўйиндан кейин ўтказилган матбуот анжуманида қатнашиб, ўйин ҳақида ўз фикрлари билан ўртоқлашди.
Мураббий йўқотишлар жамоа ўйинига таъсир қилгани ҳамда ҳозирги ва олдинги Эрон терма жамоалари ўртасидаги фарқ катта эканлигини айтди.
Эрон терма жамоасини Жаҳон чемпионатига йўл олганликлари билан табриклайман.
Агарда ўйин ҳақида гапирадиган бўлсам, учрашув ҳар икки жамоа учун ҳам ёмон бўлмади. Бизда ҳам, рақибларда ҳам яхши имкониятлар бўлди. Албатта, ғалаба қозонишимиз ҳам мумкин эди, лекин Теҳрондаги дуранг ҳам ёмон натижа эмас.
Энди бўлажак беллашувларга тайёргарлик кўрамиз. Йигитларимга раҳмат айтмоқчиман. Сабаби, уларнинг барчаси ўтган учрашувларда яхши ҳаракат қилишди. Албатта, бизни қўллаб-қувватлаш учун стадионга ташриф буюрган мухлисларимизга ва халқимизга ҳам раҳмат айтаман.
Олдинги ва ҳозирги Эронни солиштирмаган бўлар эдим. Сабаби таркибда ўзгаришлар кўп.
Шу билан бирга, сўнгги йилларда президентимиз футболни ривожлантириш учун катта ҳисса қўшмоқдалар. Ёшлар футболини ҳам юксакларга олиб чиқиш учун бир неча ишлар олиб борилмоқда. Шунинг учун бу ишлар ҳам ўз мевасини бермоқда.
Ўйиндан аввал Эрон терма жамоасини батафсил ўрганиб чиқиб, уларнинг нозик томонларини таҳлил қилиб, футболчиларга етарлича кўрсатмалар бердик. Шу сабабли, бугунги беллашувда баъзи жойларда ғалаба учун жуда яқин ҳам келдик.
Алиқулов, Машарипов ва Ўруновнинг йўқлиги бир оз сезилди. Албатта, улар билан жамоамиз янада кучлироқ бўлар эди, лекин уларнинг ўрнига майдонга тушган футболчилар ҳам яхши ҳаракат қилишди.
Маълумот учун, Ўзбекистон терма жамоасининг Жаҳон чемпионати саралаш доирасидаги навбатдаги учрашувлари июнь ойида ўтказилади. Темур Кападзе жамоаси 5 июнь куни БАА майдонига сафар уюштирса, 10 июнь куни Тошкентда Қатар терма жамоасини қабул қилади.
Изоҳ (0)