Сеул марказий округ суди Жанубий Кореянинг собиқ биринчи хоними Ким Гон Хини коррупцияда гумонланиб қамоққа олишга қарор қилди. Бу ҳақда унинг ишини юритаётган махсус прокурор вакиллари маълум қилди.
Маълум қилинишича, прокуратура илтимосномаси бўйича тингловлар 4 соатга яқин давом этган. Қамоққа олишга далилларни йўқ қилиш эҳтимоли сабаб бўлгани айтилмоқда. Бу республика тарихида биринчи марта собиқ президент рафиқасини қамоққа олиш учун ордер берилиши ҳисобланади.
Ким Гон Хига қарши иш 16 банддан иборат бўлиб, унга Deutsch Motors автодилерининг қимматли қоғозлари билан фирибгарлик қилиш, порахўрлик, шунингдек, депутатлар сайловига аралашиш айблари қўйилган.
Собиқ президент Юн Сок Ёл апрель ойида мамлакатда ножоиз ҳарбий ҳолат жорий этгани сабаб президентлик лавозимидан четлатилиб, қамоққа олинган эди. У март ойида озод этилган бўлса-да, далилларни йўқ қилишга уринганлиги туфайли июль ойида яна қайта ҳибсга олинган. Ҳозирда у исён кўтарганлик ва бошқа оғир жиноятлар бўйича суд қилинмоқда.
Терговчиларнинг маълум қилишича, ўтган ҳафта собиқ президентни рафиқасининг иши бўйича сўроқ қилишга ҳаракат қилинган, бироқ у қамоқхона формасини ечиб, ич кийимда ерга ётиб олиб, қаршилик кўрсатган. Ҳозирда прокурорлар Юннинг адвокатлари билан музокара олиб бормоқда.
Юн ва унинг рафиқаси 2022 йилги парламент сайловида маълум бир номзодни илгари суриш учун консерватив “Халқ қудрати” партиясига босим ўтказганликда гумон қилинмоқда. Терговга кўра, бу ишда сайлов натижаларини ўрганувчи агентлик асосчиси Мён Те Гюн воситачилик қилган.
Эслатиб ўтамиз, 2024 йил 3 декабрь куни собиқ президент Юн тарафидан эълон қилинган ҳарбий ҳолат бир неча соат ичида тугатилган. 14 декабрь куни парламент уни импичмент қилиб, апрель ойида эса Конституциявий суд президентни расман лавозимидан четлатган эди.
Изоҳ (0)