Жаҳон чемпионати саралаши доирасидаги Қатар—Ўзбекистон учрашувидан сўнг Сречко Катанес матбуот анжуманида қатнашиб ўйин ҳақида фикр билдирди ва журналистлар саволларига жавоб берди.
“Биринчи бўлимда йўқ жойдан иккита гол ўтказиб юбордик. Кейин ўзимизни ўнглаб иккита гол урдик. Бу футбол, биз охирида гол ўтказиб мағлубиятга учрадик”, - дейди мураббий.
Катанес Машариповнинг шамоллаганига қарамай ўйинга қўшилганига изоҳ берди.
“У яхши савиядаги футболчи бўлганлиги учун ҳам уни туширдик. У ўйиннинг иккинчи бўлимида майдонга туширишни илтимос қилганди. Захира пайтида мен таваккалчиликка қўл урдим”, деди Ўзбекистон мураббийи.
Меҳмонлар устози Машарипов майдонга тушганида бир позицияда икки футболчи пайдо бўлиб қолганига изоҳ беришни хоҳламаслиги ва ҳамманинг ўз фикри борлигини таъкидлади.
Қатарлик журналист жамоанинг бугунги ўйини ва келажакдаги имкониятлар ҳақида сўради.
“Қандай қилиб сўнгги дақиқада оддий гол ўтказдик, буни билмайман. Анча пайтдан бери мағлубиятга учрамаётган эдик, шунинг учун бу мухлислар учун оғир. Олдимизда яна 5 та ўйин бор”, дея жавоб берди бош мураббий.
Катанес сўнгги дақиқаларда ҳимоячи тушириб дурангга ҳаракат қилиш керак, деган топшириқ берилмаганини айтиб ўтди.
“Мен футболчиларга бундай демадим. Билмайман нима учун бундай бўлди, бошқа ўйинларда ҳам кўрсангиз ҳам шундай воқеаларни кўрасиз. Бу саволга жавобни дунёнинг энг кучли мураббийлари ҳам бера олмайдилар. Бундай вазиятда футболчилар дуранг натижа қониқарли бўлади деб ўйлашади”, дейди бош мураббий.
Маълумот учун Ўзбекистон терма жамоаси ушбу мағлубиятдан сўнг ҳам турнир жадвалида иккинчи ўринда бормоқда. Жамоа кейинги турни Шимолий Кореяга қарши 19 ноябрь куни ўтказади.
Изоҳ (0)