Осиё минтақасидаги Жаҳон чемпионати саралашининг 6-тур учрашувлари якунига етди. Ушбу турда Шимолий Корея— Ўзбекистон, БАА—Қатар, Қирғизистон—Эрон қарама-қаршиликлари кузатилди.
-qDgQYK_x.jpg)
Лаосда ўтган баҳсда Ўзбекистон миллий жамоаси Аббосбек Файзуллаевнинг ягона голи эвазига ғалаба (0:1) қозонди. 80-дақиқада белгиланган пенальтини бартараф этган Ўткир Юсуповнинг ҳам қўлга киритилган 3 очкода хизматлари катта.
Эрон Қирғизистонга қарши учрашувда жиддий қаршиликка учради. Аввалига 2 тўп фарқи билан олдинга чиқиб олган форслар Самарқанднинг “Динамо” клуби футболчисининг дубли сабаб қийин аҳволга тушиб қолди. А гуруҳи етакчилари Сардор Азмуннинг 76-дақиқадаги голи сабаб Бишкекдан 3 очко билан қайтди — 2:3.
Қатар кутилмаганда БААга қарши учрашувда 5 та гол ўтказиб юборди. Ушбу учрашув Фабио Лиманинг “бенефис”ига айланиб кетди. Биринчи бўлимда 3 та гол урган футболчи иккинчи бўлимда ҳам ўз ҳисобига гол ёздириб қўйди ва учрашувда поккер қайд этди. Яҳё Ал-Ҳассани учрашувдаги бешинчи голга муаллифлик қилди.
Маълумот учун, Фабио Лима Ўзбекистонга қарши учрашув учун Тошкентга келмаган эди. Сабаби, футболчи БАА клубида ўйнаш учун Ўзбекистон Республикаси паспорти билан рўйхатдан ўтган. Бу эса ижтимоий тармоқларда муҳокамаларга сабаб бўлиб Фабио Ўзбекистонга келса, қамоққа олиниши мумкинлиги ҳақида гаплар тарқалганди.
6-тур учрашувларидан сўнг Эрон 16 очко билан пешқадамликни сақлаб турибди. Ўзбекистон миллий жамоасидаги очколар сони 13 тага етди. БАА қатарликлар устидан қозонилган ғалаба эвазига 10 очко тўплаб, Ўзбекистонни қувишда давом этмоқда. Қатар мундиалга тўғридан-тўғри чиқиш имконини кескин камайтирди. Улар ҳисобида 7 очко бор.
Ўзбекистоннинг 7-турдаги рақиби қўшни Қирғиз Республикаси 3 очко билан 5-ўринда. Шимолий Корея 2 очко билан гуруҳда сўнгги ўринга жойлашди.
Маълумот учун, саралашнинг навбатдаги баҳсларига келгуси йилнинг март ойида старт берилади. Гуруҳда биринчи ва иккинчи ўринни олган жамоалар мундиал йўлланмасини қўлга киритса, учинчи ва тўртинчи ўриндаги жамоалар бошқа гуруҳдаги жамоалар билан 2,5 та йўлланма учун кураш олиб боради.
Изоҳ (0)