Мадриднинг “Реал” клуби ҳимоячиси Лукас Васкес жорий мавсум якунида жамоани тарк этишга яқин турибди. Бу ҳақда Todofichajes нашри хабар берди.
Манбага кўра, тажрибали футболчига Европадан ташқаридаги клублар, хусусан Саудия Арабистони ва Қатар чемпионатлари вакиллари қизиқиш билдирмоқда. Лукас Қатар клубидан молиявий томонлама анча яхши бўлган таклиф олгани айтилмоқда. Агар келишувга эришилса, испаниялик ҳимоячининг кейинги манзили Осиё қитъаси бўлиши мумкин.
Шунингдек, Саудия Про Лигасидан ҳам бир нечта клублар Васкес атрофидаги вазиятни ўрганиб чиқмоқда. Бироқ футболчи ҳозирча таклифларни кўриб чиқаётгани йўқ, сабаби у “Реал” билан Клублар ўртасидаги Жаҳон чемпионатида муносиб иштирок этишни истамоқда. Шундан кейин келажаги ҳақида ўйлаб кўради.
Футболчи январь ойида берган интервьюсида шундай деган эди:
Кетиш ёки қолиш ўз қўлимда. Мавсум якунлангач, қарор қабул қиламан.
33 ёшли Васкес 2015 йил ёзидан бери “қироллик клуби” сафида тўп сурмоқда. У мадридликлар билан 22 та чемпионлик, жумладан, 5 та Чемпионлар Лигаси олтин медалларига эга чиққан. Ҳимоячининг амалдаги шартномаси 2025 йилнинг июнь ойида якунига етади. Transfermarkt портали футболчининг қийматини 3,5 миллион евро деб баҳоламоқда.
Изоҳ (0)