Жаҳон чемпионати саралаш босқичи 8-тур доирасидаги Эрон — Ўзбекистон баҳси 25 март, сешанба куни бўлиб ўтди. Унда жамоалар 2:2 ҳисобида дуранг ўйнашди. Беллашувлардан кейин Wе Глобал Football портали миллий жамоаларнинг Америка қитъасида бўладиган мундиалга йўлланма олиш имкониятларини баҳолади.
Унга кўра, Ўзбекистон миллий жамоасининг А гуруҳидан океан ортидаги Жаҳон чемпионатига тўғридан-тўғри йўлланма олиш имконияти 96 фоизга баҳоланмоқда. Қирғизистонга қарши баҳсдан кейин бу рақамлар 92,6 фоизни ташкил қилаётган эди. Теҳронда қўлга киритилган 1 очкодан кейин жамоанинг имконияти салкам 4 фоизга ошди.
Темур Кападзе жамоаси Мундиал масаласини ҳал қилиши учун 1 очко етарли. Ўзбекистон 5 июнь куни сафарда Бирлашган Араб Амирликлари жамоасига қарши майдонга тушади. Агар ушбу баҳсда дуранг натижаси қайд этилса, “оқ бўрилар” муддатидан аввал йўлланмани нақд қилишади. Агар амирликлар майдонида имконият бой берилса, барча нарса 10 июнь куни Тошкентда бўладиган Қатарга қарши ўйинда ҳал бўлади.
Эрон 20 очко билан мусобақа йўлланмасини ҳал қилди. Ўзбекистон эса 17 очко билан 2-ўриндан жой олган. Кападзе жамоасининг асосий таъқибчиси ҳисобланган БАА ҳисобида эса 13 очко мавжуд. Қирғиз Республикасига 1:3 ҳисобида имкониятни бой берган Қатар тўғридан-тўғри йўлланмани қўлдан чиқарди.
Ўзбекистон терма жамоасининг кейинги учрашувлари жадвали:
6 июнь
БАА — Ўзбекистон
10 июнь
Ўзбекистон — Қатар
А гуруҳи жадвали:
1. Эрон — 20 очко
2. Ўзбекистон — 17 очко
3. БАА — 13 очко
4. Қатар — 10 очко
5. Қирғиз Республикаси — 6 очко
6. Шимолий Корея — 2 очко
Маълумот учун, Осиё қитъасидан 2 та терма жамоа — Япония ва Эрон 2026 йилги Жаҳон чемпионати йўлланмасига эга чиқди.
Изоҳ (0)