АҚШ собиқ президенти Жо Байденда простата бези саратонининг агрессив шакли аниқланди. Бу ҳақда унинг матбуот котибига таяниб, The New York Times хабар берди.
Соғлиқдаги муаммо 16 май куни шифокорлар Байденни пешоб чиқариш билан боғлиқ муаммолар туфайли текширганида аниқланган. Ташхис простата безида “қўшимча текширув” талаб қиладиган “кичик тугун” борлиги аниқлаганидан сўнг қўйилган. Метастазлар аллақачон суякларга тарқалган. Унга Глиссон шкаласи бўйича 9 балл билан тавсифланган простата саратони ташхиси қўйилган.
Гарчи бу касалликнинг агрессив шакли бўлса-да, саратон гормонларга сезгир кўринади, бу эса уни самарали даволаш имконини беради, дейилади матбуот котиби баёнотида.
Байден ва унинг оиласи шифокорлар билан биргаликда даволаш вариантларини кўриб чиқмоқда.
Жо Байден 82 ёшда, у лавозимини тарк этаётганда АҚШнинг энг кекса президенти бўлган. 2024 йили у иккинчи президентлик муддатига номзодини қўймоқчи эди, аммо кейин вице-президент Камала Ҳаррис номзодини қўллаб-қувватлади. Бундай қарорнинг сабабларидан бири Байденнинг соғлиғи билан боғлиқ муаммолар туфайли билдирилган фикрлар эди.
Маълумот ўрнида, 14 май куни қизилўнгач саратони ташхиси аниқланган Уругвай собиқ президенти Хосе Мухика 89 ёшида вафот этганди. Давлат раҳбари сифатида у жуда камтарона ҳаёт кечирган. Рафиқаси билан қишлоқ уйида яшаган ва деярли барча маошини хайрия ишларига сарфлаган. Шу сабабли ОАВда уни “дунёдаги энг қашшоқ президент” деб атай бошлашганди.
2024 йил февраль ойида Британия қироли Чарльз III га саратон касаллиги ташхиси қўйилганди. У расмий вазифаларини бажаришда давом этмоқда. Қироллик оиласининг яна бир аъзоси — Уэлс маликаси Кетрин (Кейт Миддлтон) ҳам саратон касаллигига чалинган.
Изоҳ (0)