Туркия ташқи ишлар вазири Ҳоқон Фидан Анқаранинг Украинанинг НАТОга аъзо бўлиши масаласига прагматик ёндашувни сақлаб қолаётганини маълум қилди.
Украинанинг НАТОга аъзо бўлиш истагига қарши эмасмиз, бироқ реалист бўлишимиз лозим. Бу президентимиз Ражаб Тоййиб Эрдўғон томонидан билдирилган расмий нуқтайи назардир, дея таъкидлади вазир Американинг Bloomberg телеканалига берган интервьюсида.
Америка етакчиси Дональд Трамп мамлакатнинг Украинанинг альянсга аъзо бўлишига муносабатини ўзгартира оладими, деган саволга жавоб берар экан, Фидан ҳатто АҚШнинг аввалги маъмурияти ҳам бу жараённи тўлиқ қўллаб-қувватлаганига шубҳа билдирди.
Қўшма Штатларнинг аввалги раҳбарияти Украинанинг НАТОга қўшилишини чиндан ҳам қўллаб-қувватлаганига ишончим комил эмас. Шу боис ҳозир бу масалада янги сиёсат пайдо бўлди, деб ўйламайман, деди у.
Вазир, шунингдек, Туркия бу масалани европалик ҳамкорлари ва Киев билан муҳокама қилаётганини таъкидлади.
Украина бунга нафақат расмий аъзолик учун, балки ўз хавфсизлигини кафолатлаш мақсадида интилаётганини тушуниш муҳим, дея қўшимча қилди у.
Февраль ойи бошида Зеленский агар Украинани НАТОга қабул қилишмаса, унда мамлакатда 1,5 миллион кишилик армия, армияда эса “замонавий қуроллар” бўлиши кераклигини айтган эди.
Унинг сўзларига кўра, “бугунги Америка ва президент Трамп Украинанинг НАТОга кириши ҳақида гапиришга тайёр эмас”.
Улар руслар билан эскалация сабабли Украинада НАТО бўлиши мумкин эмас деб ҳисоблашади, дея қўшимча қилди Зеленский.
Зеленский “АҚШда тайёр режа борлигини” кўрмаётганини қўшимча қилди.
Биз ҳамма нарса ҳақида гапиришга тайёрмиз. Контингентдан хавфсизлик кафолатигача. Биз ҳар қандай конструкцияга тайёрмиз, деди Украина президенти.
13 февраль куни АҚШ президенти Дональд Трамп Украинанинг тинчлик келишуви доирасида НАТОга кириши “нореал” эканлигини маълум қилди.
АҚШ президенти нима сабабдан Россия Украинага қарши кенг кўламли уруш бошлагани сабабига тўхталиб ўтган эди. Трампнинг сўзларига кўра, собиқ президент Жо Байден Украинанинг НАТОга аъзо бўлиш истиқболлари ҳақида гапирган. Бу эса гўёки “Россияни кенг кўламли ҳарбий босқинни бошлашга ундаган”. АҚШ президенти россияликлар ўзларининг “мавқейи” туфайли Украинанинг НАТОга тўлақонли аъзоси бўлишига “йўл қўя олмаслиги”ни айтди. Бироқ қандай “мавқейи” ҳақида гап кетаётганига изоҳ бермаган.
Изоҳ (0)