АҚШ президенти Жо Байденнинг рафиқаси Жилл жарроҳлик амалиётини ўтказди — биринчи хонимдан тери саратони ўсмалари олиб ташланди. Бу ҳақда Associated Press президентнинг даволовчи шифокори Кевин O’Коннорнинг баёнотига таяниб, хабар берди.
Операция 11 январь куни Мериленд штатидаги Уолтер Рид тиббиёт марказида ўтказилди. ЎКоннорнинг сўзларига кўра, у ерда биринчи хоним ўнг кўзи устидаги саратон тўқимасини олиб ташлаш учун Моса методидаги операциядан ўтган.
«Биз терининг ушбу соҳасини парваришловчи муолажаларни диққат билан кузатиб борамиз, аммо қандайдир қўшимча процедуралар талаб қилинади, деб ўйламаймиз», — дейилади шифокор ҳисоботида.
Бундан ташқари, операциядан бироз олдин чап кўкракда терининг саратон тўқималари бор бўлаги аниқланган, у ҳам олиб ташланган. Шифокорлар, шунингдек, Байден хонимнинг чап кўзи атрофида кичик жароҳатни аниқлади, ҳозир бу жой текширилмоқда.
Жилл Байден операциядан кейин «ўзини яхши ҳис қилмоқда», дейилади ҳисоботда. O’Коннор «у бир кунда Оқ уйга қайтиши»ни таъкидлаган.
АP хабарига кўра, Жилл Байденнинг ташхиси базал ҳужайрали карсинома деб аталади. Бу тери саратонининг даволаш имкони энг юқори бўлган шакли. Саратон секин ривожланади ва одатда терининг сиртидан бошқа тўқималарига тарқалмайди — шифокорлар деярли ҳар доим жарроҳлик йўли билан бутун зарарланган тўқималарни олиб ташлаши мумкин. Бундан ташқари, касаллик камдан-кам ҳолларда жиддий асоратларни келтириб чиқаради ёки ҳаёт учун хавф туғдиради.
Изоҳ (0)