Profilaktik kimyoterapiyadan o‘tayotgan Uels malikasi Keyt Middlton so‘nggi haftalarda saraton kasalligining “inqirozli davrini yengib o‘tdi” va hozirda o‘zini ancha yaxshi his qilmoqda. Bu haqda Vanity Fair nashriga tayanib “Pravila jizni” xabar berdi.
“Uning muolajalarni yaxshi kechirayotgani hamda o‘zini ancha yaxshi his etayotgani menga ancha taskin berdi. Shubhasiz, bu o‘ta murakkab va tashvishli jarayon. Uilyam, uning ota-onasi, singlisi va ukasi Keytning atrofida jipslashgan”, — deydi qirollik oilasining do‘sti.
Avvalroq ommaviy axborot vositalarida Middlton oilasi bilan sayr qilayotgani haqidagi ma’lumotlar paydo bo‘lgan edi. Hatto shu mazmundagi videoni qirollik oilasining rasmiy YouTube kanali ham taqdim etgandi.
Shu sababli Uels malikasi 2024-yil oxirigacha yoki kuz fasligacha jamoat vazifalarini bajarishga qaytishi mumkinligi haqida taxminlar paydo bo‘ldi. Ammo Vanity Fair manbasi bu xabarlarni tasdiqlamadi.
Qayd etilishicha, Middlton ishga qaytishga shoshilmayapti va bor e’tiborini butunlay sog‘ayishga qaratmoqda. U o‘zini to‘liq yaxshi his qilganda va shifokorlar ruxsat berganida qirollik oilasiga oid vazifalarini bajarishga qaytadi.
Keyt Middlton saraton kasalligiga chalingani haqida shaxsan o‘zi mart oyidagi videomurojaatida xabar bergandi. Shu yilning fevral oyida buyuk Britaniya qiroli Charlz III da ham saraton kasalligi aniqlangandi.
Izoh (0)