АҚШ мудофаа вазири Ллойд Остин 13 февралда ўз вазифасига қайтиши мумкин. Бу ҳақда Валтер Рид тиббиёт маркази шифокорлари баёнотига таяниб, АҚШ Мудофаа вазирлиги хабар берди.
Маълум қилинишича, Остин умумий анестезия остида жарроҳлик бўлмаган муолажаларни ўтказган. Шифокорлар қовуқ билан боғлиқ муаммо АҚШ мудофаа вазирининг тўлиқ тикланишига таъсир қилмаслигини айтмоқда. Саратон касаллигини даволаш истиқболлари ижобийлигича қолмоқда.
Ллойд Остин қовуғи билан боғлиқ муаммолар туфайли 12 февраль куни қайта касалхонага ётқизилган эди. Вазир ўз ваколатларини вақтинча ўзининг ўринбосари Кетлин Ҳиксга топширган.
АҚШ мудофаа вазирида қандай касаллик мавжуд?
2023 йил декабрь ойининг бошларида Остинда простата саратони борлиги аниқланганди. 22 декабрь куни умумий наркоз остида ундан ўсимта олиб ташланган, шундан кейин у касалхонадан чиққан. Бироқ, 2024 йил 1 январда у асоратлар туфайли қайта касалхонага ётқизилган, унинг қорин соҳаси, бел ва оёқ қисмида кучли оғриқ кузатилган. Ўшанда Пентагон раҳбарида сийдик йўлларининг инфекцияси аниқланган.
Вазир тўрт кун интенсив терапия бўлимида бўлган. Ўшанда Пентагон президент Жо Байден ва унинг администрациясини бу ҳақда хабардор қилмаган. Оқ уй бундан фақат 4 январь куни хабар топган. 23 январь куни Остин жамоатчиликка кўриниш берган. ОАВ у вазн йўқотгани ва ҳолдан тойган кўринишда бўлганини қайд этган.
Изоҳ (0)