Дональд Трамп маъмурияти собиқ президент Жо Байден томонидан қўшимча равишда юборилган 20 минг ҳарбийни Европадан олиб чиқиши мумкин. Бу ҳақда манбаларга таяниб, The Washington Post хабар берди.
Январь ойида исми ошкор этилмаган европалик дипломат худди шундай маълумотларни келтирган эди. Февраль ойи ўрталарида АҚШнинг НАТОдаги собиқ элчиси Жули Смит ҳам 20 минг америкалик ҳарбийни олиб чиқиб кетиш эҳтимоли ҳақида гапирган.
Пентагон раҳбари Пит Хегсет 14 февраль куни Мюнхен хавфсизлик конференцияси чоғида “Американинг (Европадаги) иштироки абадий давом этади”, деб ўйламасликка чақирган эди. Шунга қарамай, у Европа қўшинларининг қитъадаги даражаси муҳимлигини таъкидлаган.
The New York Times газетаси ёзишича, Европа Иттифоқи расмийлари Хегсет билан учрашувдан сўнг АҚШнинг ўн минглаб ҳарбийлари Европадан чиқиб кетишини кута бошлаган. Европа етакчилари агар Америка контингентининг қисқариши ҳақиқатан ҳам содир бўлса, бу Вашингтон ва Москва ўртасидаги музокаралар натижаси бўлмаслигига кафолат олишни хоҳлайди.
Трампнинг Россия билан яқинлашишга интилиши Европа давлатларини ташвишга солмоқда. Улар Вашингтон Москванинг НАТОни Шарқий Европадан чекинишга мажбурлаш талабини қабул қилиб, Россия қўшни давлатларини заиф ҳолатда қолдиришидан хавотирда. Бу эса Европанинг ўз мудофаасини мустаҳкамлашга улгурмасидан юз бериши мумкин.
Европадаги АҚШ қўшинлари сони 2022 йилдан бери 75 мингдан 105 минг кишигача бўлган, улардан 63 мингга яқини доимий равишда минтақада жойлашган. Уларнинг энг кўпи Германияда тўпланган (қарийб 35 минг).
1950-1990 йилларда АҚШнинг Европадаги ҳарбийлари сони 200-400 минг кишидан ошган. Америка ҳарбий базалари Германия, Италия, Испания, Британия, Польша, Руминия, Болгария, Болтиқбўйи ва бошқа Европа давлатларида мавжуд.
Изоҳ (0)