АҚШ президенти Дональд Трамп бадавлат хорижликларга 5 миллион долларлик “олин карта” сотилишини айтди. Бу чет элликларга АҚШда яшаш ва ишлаш ҳуқуқини бериш билан бирга фуқаролик олиш имкониятини тақдим этади. Бу ҳақда CNN хабар берди.
Биз олтин карта сотамиз. Сизда яшил карта бор. Бу эса олтин карта. Биз бу картанинг нархини тахминан 5 миллион доллар қилиб белгилаймиз ва у сизга яшил карта имтиёзларини беради, шу билан бирга, фуқароликка эришиш йўли бўлади. Натижада бу картани сотиб олган бой одамлар мамлакатимизга кириб келади, деди сиёсатчи.
Трамп карталар сотуви тахминан икки ҳафтадан сўнг бошланишини айтди ва миллионлаб шундай карталар сотувга қўйилишини таъкидлади. У россиялик айрим олигархлар уларни харид қилишини истисно этмади.
АҚШ савдо вазири Говард Лутник айтишича, бу карта ҳукуматнинг EB-5 иммиграцион инвестор визаси дастури ўрнини эгаллайди. Мазкур дастур хорижий инвесторларга АҚШда иш ўринлари яратадиган лойиҳаларга сармоя киритиш ва кейин АҚШга кўчиб келиш учун виза олишга ариза топшириш имконини беради.
Албатта, улар дунё миқёсидаги фуқаролар эканига ишонч ҳосил қилиш учун текширувдан ўтишлари керак, деди Лутник.
АҚШ Фуқаролик ва иммиграция хизматлари веб-сайтида кўрсатилишича, 1992 йилда Конгресс томонидан ташкил этилган EB-5 дастури америкалик ишчилар учун иш ўринлари яратиш мақсадида камида 1 050 000 доллар ёки мақсадли бандлик ҳудудлари деб аталадиган иқтисодий қийин аҳволдаги жойларга 800 000 доллар сармоя киритган муҳожирларга яшил карта бериши мумкин.
Трамп ва унинг оиласига алоқадор корхоналар ҳам йирик кўчмас мулк лойиҳаларини молиялаштириш учун ушбу дастурдан фойдаланган.
Дастур Трампнинг биринчи президентлик муддатида Конгрессдаги икки партия вакилларининг танқидига учраган. Кўпчилик дастур ўз мақсадларидан четлашгани ва ислоҳ қилиш зарурлигини айтган.
2019 йилда Трамп администрацияси мақсадли иқтисодий ҳудудлар учун минимал инвестиция миқдорини 900 минг долларга, бошқа жойларда эса 1,8 миллион долларга оширишга уринган. Бироқ 2021 йилда федерал судья қоидани тасдиқлаган ички хавфсизлик вазири вазифасини бажарувчи шахс тўғри тайинланмаганини аниқлаган ва ўзгаришни бекор қилган.
Дастур сўнгги марта 2022 йилда Байден маъмурияти даврида янгиланди, бунда минимал инвестиция талаблари ҳозирги даражага кўтарилди.
Изоҳ (0)