АҚШ президенти Дональд Трамп Киевга барча ҳарбий ёрдамни тўхтатишни буюрди. Бу ҳақда Bloomberg хабар берди.
Маълум қилинишича, АҚШ Украинага барча жорий ҳарбий ёрдамни унинг раҳбарияти тинчликка содиқлигини намойиш этмагунча тўхтатади. Пентагоннинг юқори мартабали вакили мазкур маълумотни тасдиқлаган. Оқ уйдаги жанжалдан сўнг Трамп агар украиналик ҳамкасби Владимир Зеленский тинчлик истаётганини тасдиқласа, Киев Вашингтон билан музокараларга қайтиши мумкинлигини айтди.
Гап ҳозирда Украинада бўлмаган Америка ҳарбий техникасини, жумладан, Польша орқали ўтаётган қуролларни етказиб беришни тўхтатиш ҳақида кетмоқда. Трамп мудофаа вазири Пит Хегсетга тегишли буйруқ берган.
Бу ёрдамнинг узил-кесил тўхтатилиши эмас, бу пауза, дея аниқлик киритди Fox News телеканалига президент маъмурияти вакили.
The Wall Street Journal 3 март куни Американинг амалдаги ва собиқ амалдорларига таяниб, Трамп маъмурияти Украинага янги қурол-яроғ етказиб беришни молиялаштиришни тўхтатгани ҳақида ёзган эди. Газета маълумотларига кўра, шу куни Оқ уй йиғилиш ўтказади, унда Америка арсеналларидан барча қурол-яроғларни музлатиш масаласи муҳокама қилинади.
♦ Президентлар ўртасидаги жанжал 28-фэврал куни содир бўлди. Зеленский Россия президенти Владимир Путин билан дипломатик муносабатлар ўрнатишга қарши чиқиб, ўз позициясини Москва илгари эришилган келишувларни бир неча бор бузгани билан асослади.
Бунга жавобан Трамп ва АҚШ вице-президенти Венс Зеленскийни танқид қилиб, уни урушни давом эттириш истаги ва Америка томонига ҳурматсизликда айблади. Охир-оқибат, учрашув баҳсга айланиб кетди ва Зеленский фойдали қазилмалар бўйича битимни имзоламасдан Оқ уйни муддатидан олдин тарк этди.
Воқеадан сўнг Трамп маъмурияти Украинага ҳарбий ёрдамни тўхтатишини эълон қилди. Оқ уй расмий вакили Керолайн Левиттнинг таъкидлашича, АҚШ тинчлик музокараларини устувор вазифа деб билади ва энди “жуда узоқ мамлакатдаги уруш учун чек ёзиш” ниятида эмас.
АҚШ 2022 йил 24 февралдан бери Украинага 65,9 миллиард долларлик ҳарбий ёрдам кўрсатди.Вашингтон Киевга қанча миқдорда қурол юборганини маълум қилмади.
АҚШнинг аввалги президенти Жо Байден маъмурияти “Украинага хавфсизлик соҳасида ёрдам кўрсатиш ташаббуси” деб номланган дастур доирасида Киевга 33,2 миллиард доллар ажратди, деб ёзди The New York Times. Тақдим этилган маблағлардан Киев фақат тўғридан-тўғри Америка мудофаа компанияларидан янги ҳарбий техника сотиб олиш учун фойдаланиши мумкин. Байден даврида АҚШ навбатдаги траншлар ҳақида тахминан 44 кунда бир марта эълон қилган, Трамп маъмурияти эса ҳеч қандай эълон қилмаган: масалан, NYT таъкидлаганидек, дастур бўйича сўнгги маблағ ажратилиши 2024 йил 30 декабрда эълон қилинган. Трампнинг инаугурацияси 2025 йил 20 январда бўлиб ўтган эди.
Изоҳ (0)