АҚШ давлат департаменти терроризмга қарши курашда ёрдам бермагани учун Куба билан мудофаа алоқаларини узиб, унга “тўлиқ ҳамкорлик қилинмайдиган давлат” номини берди. Бу ҳақда Fox News хабар берди.
Куба 2024 йилда 11 нафар қочқинни АҚШга топширмагани бунга сабаб қилиб кўрсатилмоқда. Қўшма Штатлар давлат департаменти матбуот котиби Темми Брюс 13 май куни “Қурол-яроғ экспорти назорати тўғрисидаги” қонунга асосланиб Кубага мудофаа хизматларини сотиш ёки экспорт қилиш учун лицензия бериш тақиқланишини маълум қилган.
“2024 йилда Куба терроризмга қарши курашда Қўшма Штатлар билан ҳамкорлик қилмади. Кубада камида 11 нафар америкалик суддан қочганлар бор. Куба ҳукумати эса уларни мамлакатимизга қайтармаслигини маълум қилди,” деди Брюс ўз баёнотида.
АҚШ давлат котиби Марко Рубио нафақат Кубани, балки Эрон, Сурия, Венесуэла ва Шимолий Кореяни “тўлиқ ҳамкорлик қилинмайдиган давлат”лар қаторига киритиб қўйган.
2025 йил январь ойида Дональд Трамп ҳокимиятга келмасдан аввал Байден маъмурияти Кубани терроризмга ҳомийлик қилувчи давлатлар қаторидан чиқарган эди.
Изоҳ (0)