2020 йил АҚШда бўлиб ўтадиган президентлик сайловларида демократлар партиясидан номзод Жо Байден, Трампнинг асосий рақиби ҳисобланади. 2009-2017 йилларда вице президент лавозимида ишлаган Байден, президент бўлса, вице-президент курсисида 55 яшар Камала Харрисни кўришни истайди. Сўнгги вақтда ОАВ ва сўнгги янгиликлардан исми тушмаётган бу аёл ким? Қуйида ушбу саволга жавоб берамиз.
Оила ва таълим
Сенатор Камаланинг онаси АҚШга кўчиб келган ҳинд иммигрантларидан бўлган. У университетда таълим олаётган йиллари ямайкалик Донал Харрис билан танишган ва унга турмушга чиққан. Уларнинг турмуши узоққа бормаган ва Камала кичиклигидаёқ ажрашиб кетган. Онаси фан, саратон тадқиқотчиси, ўқитувчи ва фаол сифатида қизига ўрнак бўлган. Мактабни битирганидан кейин Вашингтонда жойлашган Ховард университетига қабул қилинади ва у ерда иқтисодиёт ва политологияни ўрганади. Кейинроқ Калифорнияга қайтади, ўқишини юриспруденсия йўналишида давом эттиради ва ҳуқуқ бўйича докторлик диссертациясини ҳимоя қилади. Талабалик йилларидаёқ сенат офисида секретар бўлиб ишлаган, кейин бўлса Калифорниянинг Окленд шаҳрида жойлашган прокуратура округида фаолиятини давом эттирган ва 2003 йилда Сан-Франциско яқинидаги округнинг прокурори бўлган. 2010 йилда бўлса, Калифорния штатининг бош прокурори, лавозимини эгаллаб, 2016 йилда мазкур штат сенатори бўлишга муваффақ бўлади.
Унинг синглиси Майя ҳам ҳуқуқ бўйича таълим олган ва юрист бўлган. У Хиллари Клинтон президентликка номзодини қўйган вақтларда унинг жамоасида бўлган ва сайлов компаниясида иштирок этган.
Сиёсий қарашлари
Камала, Барак Обама ва унинг сиёсий қарашларини қўллаб-қувватлаган ва айнан у туфайли сиёсий карьера қилишга қарор қилган. Трампга эса сенаторнинг солиқларни ошириш, армия ва полицияни молиялаштиришга ажратиладиган маблағни камайтириш, тиббиётни қулай қилиш борасида Оқ уйда ташкил этилган брифингда айтган фикрлари ёқмаган. «Камала Харрис ниҳоятда ярамас одам. У АҚШдаги энг қўпол, ҳурмат нималигини билмайдиган ва энг либерал сенатор», — деган Трамп. Шунингдек, Американинг амалдаги президентини Камаланинг омма эътиборини жалб қилиш ва сайловчиларни, демократчилар оппонентига овоз беришга қодир босими очиқчасига чўчитади ва уни ўзининг шахсий душмани деб ҳисоблайди. Демократчи Байден эса Twitter саҳифасида Трампдан фарқли ўлароқ, Камалани, фуқаролик ҳуқуқи учун курашадиган энг яхши давлат хизматчилардан бири деб атаган.
Жамиятнинг турли қатлам вакиллари учун таълим ва тиббиётни бирдек бўлишидан ташқари сенатор, иммиграцион қонунчиликни реформация қилиш ҳамда жамиятда ҳали-ҳамон ҳукм сураётган сегрегацияни (ирқий камситиш) бартараф қилишни истайди. Демократлар эса уни радикал бўлмаган, марказлаштирувчи деб ҳисоблайди.
Шахсий ҳаёти
Харрис 2014 йил 22 августда адвокат Дуглас Эмхоффга турмушга чиққан. Дуглас Бруклинда дунёга келган ва ёшлигида оиласи билан Калифорнияга кўчиб келган. Жуфтлик Санта-Барбарада турмуш қурган. Камала билан оила қуришига қадар Эмхофф биринчи рафиқаси билан 25 йил яшаган ва турмушидан икки фарзанди бўлган.
Жо Байден билан муносабатлари
Ҳозирда Байденни қўллаб-қувватлайдиган Харриснинг унга бўлган муносабатлари авваллари бошқача бўлган. 2019 йилда президентликка номзодини қўйишни эълон қилган Камаланинг биринчи дебати, имтиёзли мактабларга оқ танли болалардан ташқари, ночор туманларда яшовчи муҳожирларнинг фарзандлари ҳам қабул қилинаётгани ёқмаган Байденни танқид қилиш майдонига айланган. Бу дебатлар Жо Байденни сиёсий қарашларини ўзгартиришга мажбур қилган. Алал-оқибат Камала, президентликка номзодини қўйиш фикридан қайтиб, Байденни қўллаб-қувватлашга қарор қилган. Уларнинг ҳар иккисини ички сиёсат бўйича қарашлари кўп борада кесишади, ташқи сиёсат бўйича эса улар деярли бир хил фикрлайди. Ушбу сиёсий дуэт Америка сайловчилари учун ишонарли бўладими, ёки йўқ буни вақт кўрсатади.
Изоҳ (0)